أخت لنا تقول؛ انا حبيت بس اشارك بحاجة ايجابية ممكن افيد بيها البنات والشباب اللى معانا هنا.
انا اتجوزت من عشر سنين، احنا ٣ سلايف، وانا اللى قاعده مع حماتى فى البيت، وانا كنت صغيره، وطبعا انا بس فى البيت اخدم واعمل لاخوات جوزي اكل لما ييجوا عندى، كنت بزعل فى نفسى بس كان معايا
زوج راجل يعرف يطبطب ويحايل ويجيبلى شبسى وشكولاته، كأني بنته وعلشان انسى التعب، وكل ما اقوله تعبت واشمعنا انا بس وكلهم مرتاحين يقولى انا ببر
أمي، وانتى بتساعدينى؛ كنت اهدأ.
الخلاصه اننا مش ملايكه، كلنا بنتعب اول الجواز، نتحمل شويه بعض، خليك راجل تعرف تطبطب وتحايل، وانتى كمان خليكى قد المسئوليه؛ مفيش حد مبيتعبتش فى بداية جوازه، حياه جديده وناس اغراب، كنتى متدلعه فى بيت ابوكى تدخلى بيت تشتغلى وتتعبى فيه.
انا بعد عشر سنين من جوازى مقدرش دلوقتى استغنى عن حماتي، اقسم بالله، وهى اتعودت عليا وانا اتعودت عليها، كانها أمي، مع انها كانت صعبه جدا جدا والله، بس كله يهون مع العشرة.
ربنا يهدي البنات والشباب الايام دي حالات الطلاق انتشرت بطريقه صعبه جدا جدا والله، ياريت نستحمل بعض ونحاول نتجاوز عن الثغرات اللى فى حياتنا ونتمسك بالقرآن والصلاه هما النجاه.
بالمناسبة، لما كنت اتخنق خالص كنت اشكى لربنا وابكى والاقيها اتعدلت من فوق، عليكم بكثرة الدعاء لربنا، هو قادر عل كل شيء.
