المحرر موضوع: زوجي بيتهمني اني مش بحب اهله  (زيارة 194 مرات)

محتار

  • Sr. Member
  • ****
  • مشاركة: 331
    • مشاهدة الملف الشخصي

زوجي بيتهمني اني مش بحب اهله

« في: نيسـان 27, 2021, 02:43:16 مسائاً »
انا متجوزة من ٥ سنين من حد مش من نفس محافظتي؛ طول الفترة دي بيقول اني مش بحب انه يروح لاهله واني مش بحبهم رغم اني بعيدة عنهم.

لما بيسافر بيفضل هناك فترة طويله حوالي اسبوعين واحيانا اكتر، وانا معايا ٣ اطفال جبتهم فوق بعض؛ يعني كان معايا طفلة بترضع وكنت حامل في الفترة دي مراة اخوه ولدت، سابني وانا حامل ومعايا بنتي وقعد ١٠ ايام في البلد وكنت كل ما اتصل بيه يرجع والدته تقولي اصل مراة اخوه تعبانة والولد في الحضانة وتعبان ومش هيقدر يسيبنا.. رغم ان عنده اخين تاني غير جوزها ووالده موجود.

واكتشفت انهم عاملين سبوع كبير يعني اي حد هايقول ازاي سبوع وهي والولد تعبانين ومعلقتش على كده؛ وطبعا اي حد بيشتغل في قطاع خاص هيعرف انه صعب الاجازات وبتكون بخصم من المرتب؛ فمن الصعب اني كنت اسافر معاه.

دايما اقوله سافر كل اسبوعين ٣ ايام احسن ماتسافر كل ٤ شهور ١٥ يوم و دايما يتهمني اني بكرهم ومش عيزاه يسافر.

انا امي متوفيه من ١٧ سنة وابويا اتوفي من اقل من شهر؛ وعندي اخت واحدة ووحشه معايا، بس ماتجوزتش وبقيت يتيمة ام واب.

وفي نفس الوقت اخوه هيتجوز، طلب مني اسافر معاه عشان يكون جنب اخوه قولتله الظروف مش هتسمح انا لسه في حاله حزن لما اخوك يتجوز اجي يوم ونرجع مع بعض واتفقنا علي كده والمفروض ان اخوه كان هيتجوز بعد ٥ ايام اتفاجات انه بعد ما سافر ب ٥ ايام انهم لسه محددوش اصلا اخوه هيتجوز امتي.

وهو معاه في التجهيزات زي الفرش والكلام ده وبعد ١٢ يوم قولتله هتيجي امتي لقيته بيقولي تعالي مش اتفقنا هتيجي يوم وهم بردو محددوش المعاد فا انا قولتله انا مش هقدر اسيب اختي وانا اصلا معرفش هرجع امتي وطالما انت عايز تكون مع اخوك وعايزنا يبقي مش هيكون موضوع يوم ونرجع انت هتكون مطمئن واحنا معاك، بس انا لسه ابويا متوفي مكملش شهر يعني لسه الحزن صاحي ودخلنا رمضان واختي لوحدها حتي لو هي وحشه انا اسيبها ازاي تحس باليتم بسرعة كده في شهر الناس بتتجمع فيه؟

مع ان اصلا مافيش حد في اخواته حضر معاه فرش بيتنا ولا حد حضر معاه اي ولادة؛ ليه ماحدش جه غير في ولادتي الاولي والدته قعدت اسبوع واخوه جه هو ومراته يوم ومشيو محدش حضر السبوع.

ولما ابويا توفي محدش اتصل بيا عزاني ولما عاتبته قالي ما هم كلموني عزوني انا.

دلوقتي هو بيتهمني اني انسانه وحشه وكلمني باسلوب حاد واتهمني اني مش بحب اهله ومش عيزاهم يشوفو العيال.

مستشار

  • Sr. Member
  • ****
  • مشاركة: 362
    • مشاهدة الملف الشخصي

رد: زوجي بيتهمني اني مش بحب اهله

« رد #1 في: نيسـان 27, 2021, 02:45:29 مسائاً »
هو اصلا كبيرة اوي انهم لم يعزوكي في ابوكي ولا جوم ... دي صعبة بجد؛ طيب بنقول الفرح ماشي لكن الحزن والعزاء بالذات مفيهوش نقاش.

جناح طاير

  • Sr. Member
  • ****
  • مشاركة: 265
    • مشاهدة الملف الشخصي

رد: زوجي بيتهمني اني مش بحب اهله

« رد #2 في: نيسـان 27, 2021, 02:46:10 مسائاً »
الحقيقه فعلا انك مش بتحبي اهله وبتعطي لنفسك اعذار ممكن بسهوله جدا تتحل انتي بتقولي بيروح كل اربع شهور اسبوعين ممكن قوي تروحي معاه اسبوع حتي وقطاع خاص يعني بالخصم مش مشكله ياستي انا شايفه انك غلطانه جدا مع اهله ومش بتحبي تكوني معاهم بس سؤال هي اختك عايشه معاكي ولا لوحدها

إنسان حر

  • Hero Member
  • *****
  • مشاركة: 547
    • مشاهدة الملف الشخصي

رد: زوجي بيتهمني اني مش بحب اهله

« رد #3 في: نيسـان 27, 2021, 02:49:00 مسائاً »
الاخت الفاضلة؛

انتي اديتله الايحاء ده من عندك مع انه عكس كده، يعني ولا سفر ولا عاوزاه هو يسافر؛ هو صحيح بيقعد كتير لكن يمكن كبيرهم ومهتم بيهم ولو كان مرة رحتي يوم ولا جمعة وسبت مثلا ورجعتي كان غير رأيه وانك دايمًا مشغولة وتعبانة ده بيتعبره حجج.

معلش قدمي السبت ومفيش الحمدلله مشكله عشان متكبرش، هما غلطوا معزوكيش وهو اتحجج بعزاهم ليه وده غلط. بس بلاش تخسريه بسببهم.

وخليكي عالحياد معاهم هو غالبا متعلق بيهم قوي وبلاش تحطي نفسك في نقطه معاهم، زوريهم مره بالعيال من باب حسن النية.

جمعة وسبت أو اجازة عامة؛ وعرَّفيه ان ده عشانه برضه، وانك واولاده اولي بيه من اي حد تاني.. وربنا يقرب بينكوا ويهديه ياااارب.