صديقنا (م.م) يسأل؛ شباب إيه أحسن كلية لحد عايز يتعلم برمجة، مجموعه عالي يدخله طب. يا ريت الإسكندرية، ما فيش مانع غيرها. ناس نصحوا بكلية الحاسبات وفيه بينصح بكلية العلوم.
الرد
عايز يطلع مبرمج يبقى حاسبات ومعلومات.
هندسة قسم حاسبات ليها مميزات طبعا لكن اكبر عيب فيها انها بتاخد عدد محدود جدا من الدفعة (الاوائل) فمش هيضمن انه هيدخلها + انه هيدرس في اول سنة حاجات ملهاش علاقة بالبرمجة.
اما بالنسبة لعلوم فهي مش خيار جيد لو عايز يتخصص في البرمجة.
بصفة عامة خريجي حاسبات او هندسة حاسبات بياخدوا اعلى مرتب كخريجين في السوق + ان فرصة السفر ليهم اكبر من اي مجال تاني.
الناس اللي بتقول مش بيلاقوا شغل فدة ينطبق على خريجين المعاهد انما بكالريوس حاسبات و معلومات لو خرج منه مستواه متوسط فهيلاقي شغل و يعرف ينمي من نفسه.
نصيحة اخيرة: متسمعيش نصيحة انه يدخل اي كلية و يدرس كورسات برمجة، لأننا في حاسبات درسنا ٤٨ كورس على مدار ٤ سنين + الأنشطة الجانبية + المناخ العام و دة مش هيعرف يعوضه بأي كورسات.
شرط عشان يحقق الكلام اللي فوق انه يحب البرمجة والرياضيات ويعرف يبقى جيد في المجال.
