(ح.إ)؛ يسأل، ما طريقة تقديم شكوى ضد موظف حكومي إذا سمحتم؟ لو فيه موظف في السجل المدني مش راضي يخلص لي ورقي، اشتكيه لمين، عشان روحت لرئيسه قالي بالحرف: مش هعملك حاجة واستنى لما يخلص.
الرد
الناس اللى فى الوظائف الحكومية دة اللى أنصار "فوت علينا بكرة" و "حاجتك مش موجودة عندي" ميعرفوش إن حبيبنا النبي دعا عليهم بالشقاء (اللهم من ولي من أمر أمتي شيئاً فشق عليهم فاشقق عليه) بجد هتقفوا أمام ربنا تقولوا اية ؟
الناس دي ممكن يتقضي عليها بابلكيشن واحد ونخلص كل مصالحنا من عليه بس مين يسمع وينفذ؛ حسبي الله ونعم الوكيل في كل موظف حكومة بيعطل الشغل - منهم لله.
السجل المدني بيكون تابع للقسم، فلو حصل وموظف ضايق مواطن ببساطة خالص انزل لمأمور القسم بذات نفسه الموجود فيه السجل أو من ينوب عنه واطلب مقابلته.
فرضنا متحركش ! "وده يستحيل" حضرتك تتطلب حقوق الإنسان الموجودة بالقسم.
للعلم فيه حقوق الإنسان بيكون في رائد أو مقدم غالبًا هو المسؤول عن اثبات الواقعة والتحقيق فيها.
مهم تعرف واللى حواليك يعرفوا إن عندك حلول سريعة تجبر الموظف على العمل بخلاف الشكوى.
مع تمسكك بعمل الشكوى بعد معرفة اسم الموظف ثنائي وتفصيل الواقعة وتاريخها، وده عن تجربة وخبرة.
فرضنا إنك موصلتش لحل، هتطلع المديرية وتسأل عن الشكوى في موظف مدني بالقسم أو السجل المدني، وهناك هتكتب الشكوى.
وعمومًا، اتصل على 16528 ده رقم منظومة الشكاوى الحكومية التابع للرقابة الادارية.
