انا عندي ٢٥ سنة، وزوجي ٣٢ ومتزوجة من خمس سنين تقريبا، وكان جوازنا مش تقليدي خالص، وكان بعد حب وخطأ واجبار على الجواز بسبب غلطه قبل الجواز.
والمهم في كدا أنه بعد ما كان عنده شغف الجواز مني فجاءة ابتدى يبعد ويكرهني بسبب رفض أهله ليا.. وبعدين فضلت اعمله افلام اني ممكن اكون حامل واني مش هسكت قال لأهله انا عايزني وفعلا خطبني وابتديت المشاكل من هنا.
هما متحكمين بجهل وعندهم تقديس الأصول وحاجات فعلا غريبة بيقدموا على كل حاجة وعايزين طلبات كتير مقابل ولا شئ واحنا ناس علي قدنا.
المهم أمر العلاقة الي قبل خطوبتنا وجوازنا اتكشف ليهم وكانت مشاكل كتييير جدا وكل يوم كان بيزيد كرهه ليا بسبب المشاكل دي وبعد مفاوضات حرموني من ان يكون ليا شقة؛ وقعدت مع حمايا وحماتي في نفس الشقة وعملنا فرح واتجوزنا وكأني دخلت الجحيم.
خمس سنين كلهم مشاكل؛ مفيش راحة؛ نصهم بسبب أمه وبخلها الشديد والنص التاني اني خلاص ابتديت كل حاجه اخاف منها اكدب فيها دا غير اني حملت على طول بولد لكن للاسف كان مريض كلى.. وعمل عمليات كتير منذ ولادته ولحد وفاته. وللأسف اتوفى بسبب غير مرضه كان زوجي قالي انتي طالق وسباني عند اهلي، وفي مرة خرجت بابني الصغير ده واحنا رايحين المتابعة بتاعته سيبته يلعب قدامي لانه كان هادي جدا ولعبه بسيط ومتخيلتش ابدا أنه ممكن ياخد حاجه من على الارض وياكلها والحاجه دى الي تجيب اجله.. والله ماكنت اعرف.
وللأسف اكل حاجه من غير ما اشوفه ولقيته تعب جدا، ولما جريت بيه على المستشفى اكتشفت انها حاجه مسممه. ونظرا لحالته ما استحملش وتوفى.
وطبعا وجوزى واهله ما صدقوا انو يحصل كده، وعملولي محضر إهمال لاني كنت حامل في طفل تاني، وبعد الوفاة ردني ورجعت والحزن مالي حياتنا.. وجوزى فقد عقله خالص بسبب ان اخواته بقوا يملوا دماغه اني السبب في موته وهو أساسا بيضربني على طول وزاد الموضوع بعد وفاة ابننا لدرجة انو كان عايز يموتني..
وربنا عوضنا بطفل تاني الحمد الله وهو حاليا عنده سنتين ولكن للاسف برضوا عندو مرض في الدم بينقل صفائح. وخلال السنتين برضه اهانه وضرب مستمر على كل حاجه؛ مشاكل بسبب أمه، بسبب إخواته بسبب اني كذبت في حاجة.
مابيسمعش ومابيتفاهمش، بيضرب على طول وبعدين يطلق ويمشينى بابنى وييجي اخواته ينكدو برضوا عليا واني السبب واني مش كويسه ومش نافعه وانا الي عملت كده وهو مبيغلطش ملاك وييجوا يضغطوا وترجعي عشان العيل، وارجع..
لحد آخر مشكلة اليومين اللي فاتو هو طلقني الطلقة التانية بسبب أنه برضوا مش متفاهم ويادوب عرف اني كذبت محاولش حتى يستفسر ولا يسمعني. قالي انتي طالق قبل رمضان باسبوعين. وبعد ضغط ومحايله شديدة من إخواته برغم اصراره على انفصالنا رجعت قبل رمضان بكام يوم.
وهو قاعد مع اخواتي ورجالة كبيرة حضرت المشكلة وقالوا خلاص هي متكذبش تاني لأي سبب وانت متضربهاش خالص؛ أي مشكله تحصل هاتها وتعالى واحنا نتصرف. ويدوب مكملتش اسبوع في بيتي وكام يوم من رمضان. وجيت نزلت في يوم عشان اعمل ورق التامين لابني وهو نايم فالبيت. وجيت رجعت البيت بيقولي فين الورق وانا كنت نسيته في المكتبة لانه كتير وكنت عاوزة الحق البريد؛ سمع كده من هنا واتجن ونزل فوقي بتوكة الحزام فتحلي دماغي وضرب موت، وأخواته طلعوا حاشوني وقالولي انزلي لما نخيطلك واقعدي هادية وهنيجي نصلح بينكم بعد الفطار، ومكنوش عايزني أبلغ اهلي باللي حصل. رغم انه طلقني للمرة التالتة.
نزلت وعملت محضر وانا عند اهلي دلوقتي وكل شوية يبعتوا عشان خايفين من المحضر رغم انه لسة ما اتحركش لانه محتاج محامى.
