المحرر موضوع: لماذا أخي الكبير يكرهنا ؟ ساعدوني ووجهوني كيف نتعامل معه!  (زيارة 92 مرات)

محتار

  • Sr. Member
  • ****
  • مشاركة: 331
    • مشاهدة الملف الشخصي
السلام عليكم، لو سمحتم محتاج رأيكم في المشكلة دي ويا ريت لو حد متخصص في المشكلات الاجتماعية؛

احنا أخين 29 سنة و 36 سنة ووالدنا متوفي من كام سنة، أخويا الكبير معاملته معانا وحشة جدًا، دايمًا مكشر في وشنا ومش بيتكلم معانا أبدًا والوضع بيسوء يوم بعد يوم لحد ما بطل يقول سلام عليكم وهو داخل أو خارج.

بيغلط في أمي ودايمًا يخليها تعيط في أي موسم زي أي عيد أو رمضان، مفيش أي أكل بيتعمل بيعجبه مهما كان حلو وبطل ياكل معانا، مش بيساعد في البيت بمليم ويقول انا لا باكل ولا بشرب معاكم الله الغني عنكم، مش بيساعد حتى يجيب حاجة او يقضي حاجة، ولو أمي ندهت عليه يكشر ويرد بأسلوب وحش علشان محدش يقوله يعمل حاجة، ولو حصل في مرة انه أكل يستكبر انه يقول شكرًا حتى،

مفيش أي حاجة بنعملها بترضيه، مع ان الحمد لله امي وابويا الله يرحمه ربونا كويس على قد مقدرتهم وعرفونا الحلال والحرام، وعلمونا تعليم كويس، وعملوا لاخويا ده شقة وشطبوها محطش فيها مليم.

لاحظت انه غيور مني جدًا وشايف ان اهلي كانوا بيفضلوني عليه، مع اني من صغري كنت بلبس لبسه القديم، كان بيخليهم يغيروله الموبايل كل سنة، انا بقى موبايل واحد مستعمل اللي اشتريته وانا في الجامعة، هو عملوله شقة وانا ما اتعمليش، أنا مش فارق معايا كل ده وشايفه شكليات بس مع كدة هو شايف انهم بيفضلوني عليه، دلوقتي بقى لما اجيب حاجة يغير ويجيب زيها حتى لو مش محتاجها!

بقاله سنين كتييير بقى يقعد في الشقة بتاعته على طول وما ينزلش تحت غير للنوم، مش بيرضى يتكلم معانا ولا يقول سبب تصرفاته دي، ولما حد يكلمه يحاول يفهم ماله، يعلي صوته ويجحش فيه ويقل أدبه ويدعي على نفسه وانه يغور من وشنا، أي حاجة نكلمه يقول ملكوش دعوة بيا، ولما نتجنبه ونسيبه في حاله يقول ما انتوا عايزين تخلصوا مني، مقتنع انه مضطهد مع انه مش راضي يكلم حد، ما اتجوزش لحد دلوقتي مع انه دايمًا بيكلم بنات في التليفون وعلى النت، هما مرتين اللي كان عايز يخطب فيهم وأهلي ما وافقوش؛ واحدة مكنش أهلها مناسبين وواحدة راح قعد يتفق مع أهلها من غير ما يقولنا وكانوا عايزين يشيلوه كل حاجة تقريبًا في الجهاز، ولما نسأله مفيش حد من اللي بتكلمهم دول هتتقدم لها ولا بتتسلى بيهم برضه يقول ملكوش دعوة.

المهم انه برة تعامله مع الناس حلو جدًا والناس بتشكر فيه وبتقول عليه محترم ومؤدب، مع انه معانا كل كلامه شتايم وألفاظ وحشة، أنا مقتنع تمامًا انه مش سوي نفسيًا، بس طبعًا مش هيرضى يسعى انه يصلح من نفسه وهيبهدلنا ويقولنا ده اللي ناقص تقولوا عليا مجنون لو اقترحنا انه يشوف اخصائي نفسي.

ومالوش كبير ليه كلمة عليه؛ لا عم ولا خال ولا حد هيتدخل؛ ولو حد اتكلم معاه مش هيسمع له، احنا تعبنا معاه ومش عارفين نعمل ايه، بندعي ربنا يهديه في الايام المفترجة دي بس امي بيفيض بيها وبتدعي عليه، يا ريت لو حد بيفهم في المسائل دي يشير نعمل ايه معاه.

هو رافض نقرب منه وبنحاول نعامله كويس هو دايمًا اللي بيصدنا .. ده انا جبتله هدية في عيد ميلاده قالي خليهالك.

إنسان حر

  • Hero Member
  • *****
  • مشاركة: 547
    • مشاهدة الملف الشخصي
ممكن تعمل أكونت فيك وابعتله طلب صداقه.. وخليك صديق ليه بدون ما يعرف انه انت؛ وفي يوم هيحكيلك كل حاجه.

خده صديق واشكيله همومك علشان هو يصبرك، وبعدين هيتفتحلك ويشكيلك هو كمان.

اعرف السبب الرئيسي اللي مزعله، وبعدين اقترح عليه يروح لاخصائي نفسي يكشف عنده بدون ما اهله يعرفوا؛ وهو هيسمع كلامك وهيفكر فيه وهيروح من وراكم.

بس اوعي تبين انك تعرفه أو أخوه واوعي تقسى عليه في الكلام لما يشكيلك؛ خليك معاه شويه وعليه شويه، كلمه بمنطقيه وعقل واوعي تتهور.

حسسه انه صح؛ بس المفروض يعمل كذا وكذا واقنعه في الاخر بطبيب نفسي... لو رفض قوله انك كمان هتروح لطبيب نفسي وبعد شهر كلمه قوله انك خفيت وبقيت كويس وبعدها هيفكر يعمل زيك لانه واضح جدا بيحب التقليد وان شاء لله المشكله تتحل.

جناح طاير

  • Sr. Member
  • ****
  • مشاركة: 265
    • مشاهدة الملف الشخصي
على فرضيه انه كذلك، فليس لكم إلا حسن التعامل فى حدود المتاح، ان تعامل بخير فخير وان تعامل بشر فتجنبوه الا فيما يخص امكم، يلزم ردعه بطريقه واضحه ان فعل ذلك والردع بالشده وليس بالعنف، انتم بسن كبير ويمكنكم فتح بيت، والسعى للزواج وانشاء عائلتكم، لنعود للواقع،

اخيكم اما مريض نفسي ويمر بحاله اكتئاب؛ وبالتالى يكون رد فعله غير منضبط، إما نتيجة اشياء لا تعلموها .. ومنها عدم زواجه الى الان، وعدم زواجه اما نابع من نفس المشكله النفسيه او اخري، وبالتالى يلزم تقييم حالته خوفا ان تكون مرضيه وبالتالى ستسوء جدا جدا وشكواكم الحاليه ستكون اسعد ايامكم معه.

حال كونه مريض سيحتاج لعلاج نفسي ومتابعه داءمه، . اما لو كان سوء حالته النفسيه بسبب عدم زواجه.

يلزم البحث له عن زوجه واعانته وتفحص الاسباب الحقيقيه لعدم زواجه رغم وجود الشقه، غير مهم حاليا ردود افعالكم معا، المهم امران .. انشاء اسر تخصكم وتقييم حاله وعلاجه ان كان مريض، غير هذا ستدورون بحلقه مفرغه تضيق.

واؤكد ان حسن اختياركم للزوجات او الازواج مهم جدا جدا حتى لا تدخلوا بنفق مظلم ومشاكل مضافه، بل نجاحكم بزواجكم سيحل اغلب مشكلاتكم وهناك انواع من المشكلات نستسلم لها ونتعايش معها.