السلام عليكم، لو سمحتم محتاج رأيكم في المشكلة دي ويا ريت لو حد متخصص في المشكلات الاجتماعية؛
احنا أخين 29 سنة و 36 سنة ووالدنا متوفي من كام سنة، أخويا الكبير معاملته معانا وحشة جدًا، دايمًا مكشر في وشنا ومش بيتكلم معانا أبدًا والوضع بيسوء يوم بعد يوم لحد ما بطل يقول سلام عليكم وهو داخل أو خارج.
بيغلط في أمي ودايمًا يخليها تعيط في أي موسم زي أي عيد أو رمضان، مفيش أي أكل بيتعمل بيعجبه مهما كان حلو وبطل ياكل معانا، مش بيساعد في البيت بمليم ويقول انا لا باكل ولا بشرب معاكم الله الغني عنكم، مش بيساعد حتى يجيب حاجة او يقضي حاجة، ولو أمي ندهت عليه يكشر ويرد بأسلوب وحش علشان محدش يقوله يعمل حاجة، ولو حصل في مرة انه أكل يستكبر انه يقول شكرًا حتى،
مفيش أي حاجة بنعملها بترضيه، مع ان الحمد لله امي وابويا الله يرحمه ربونا كويس على قد مقدرتهم وعرفونا الحلال والحرام، وعلمونا تعليم كويس، وعملوا لاخويا ده شقة وشطبوها محطش فيها مليم.
لاحظت انه غيور مني جدًا وشايف ان اهلي كانوا بيفضلوني عليه، مع اني من صغري كنت بلبس لبسه القديم، كان بيخليهم يغيروله الموبايل كل سنة، انا بقى موبايل واحد مستعمل اللي اشتريته وانا في الجامعة، هو عملوله شقة وانا ما اتعمليش، أنا مش فارق معايا كل ده وشايفه شكليات بس مع كدة هو شايف انهم بيفضلوني عليه، دلوقتي بقى لما اجيب حاجة يغير ويجيب زيها حتى لو مش محتاجها!
بقاله سنين كتييير بقى يقعد في الشقة بتاعته على طول وما ينزلش تحت غير للنوم، مش بيرضى يتكلم معانا ولا يقول سبب تصرفاته دي، ولما حد يكلمه يحاول يفهم ماله، يعلي صوته ويجحش فيه ويقل أدبه ويدعي على نفسه وانه يغور من وشنا، أي حاجة نكلمه يقول ملكوش دعوة بيا، ولما نتجنبه ونسيبه في حاله يقول ما انتوا عايزين تخلصوا مني، مقتنع انه مضطهد مع انه مش راضي يكلم حد، ما اتجوزش لحد دلوقتي مع انه دايمًا بيكلم بنات في التليفون وعلى النت، هما مرتين اللي كان عايز يخطب فيهم وأهلي ما وافقوش؛ واحدة مكنش أهلها مناسبين وواحدة راح قعد يتفق مع أهلها من غير ما يقولنا وكانوا عايزين يشيلوه كل حاجة تقريبًا في الجهاز، ولما نسأله مفيش حد من اللي بتكلمهم دول هتتقدم لها ولا بتتسلى بيهم برضه يقول ملكوش دعوة.
المهم انه برة تعامله مع الناس حلو جدًا والناس بتشكر فيه وبتقول عليه محترم ومؤدب، مع انه معانا كل كلامه شتايم وألفاظ وحشة، أنا مقتنع تمامًا انه مش سوي نفسيًا، بس طبعًا مش هيرضى يسعى انه يصلح من نفسه وهيبهدلنا ويقولنا ده اللي ناقص تقولوا عليا مجنون لو اقترحنا انه يشوف اخصائي نفسي.
ومالوش كبير ليه كلمة عليه؛ لا عم ولا خال ولا حد هيتدخل؛ ولو حد اتكلم معاه مش هيسمع له، احنا تعبنا معاه ومش عارفين نعمل ايه، بندعي ربنا يهديه في الايام المفترجة دي بس امي بيفيض بيها وبتدعي عليه، يا ريت لو حد بيفهم في المسائل دي يشير نعمل ايه معاه.
هو رافض نقرب منه وبنحاول نعامله كويس هو دايمًا اللي بيصدنا .. ده انا جبتله هدية في عيد ميلاده قالي خليهالك.
