انا مشكلتي كبيرة جدا ومش عايزة اطول عليكم ومحتاجه منكم تفيدوني؛ انا جوزي اتجوز عليا من كام سنة ومطلعتش من البيت وعملت مشاكل زي اي ست ممكن تعمل ودا الطبيعي لكن انا اتحرقت جوايا وسكت عشان خاطر اولادي.
بعد كدا شوفت الاهانة وضرب وحرمان من كل حاجة حتى الهدوم حرمني منها.
انضربت قدامها عشان رافضه حاجه تجرح مشاعري لكن ترضيها وترضيه وكان لازم أوفق تتعزم عندي وتتعزم في المناسبات العائلية.
مش مهم مشاعري، كنت بموت لما باشوفها بتكلموا أو واقف معاها؛ كان بيميزها في حاجات كتير ويشهد الله كنت بعامله ازاي قبل ما يتجوز.
مكنشي في بينا اي مشاكل خالص وكنت فاكره أنه بيحبني زي ما انا كنت بحبه، لكن اتجوز.
ضرب وإهانة وكسرة النفس؛ لو حكيتلكم موقف واحد بس هتقولو ازاي صبرتي واني حجر، بعد كل ده كنت بحبه واليوم بتاعي بخليه يمشي مبسوط وبرده فارق المعامله بيني وبينها.
آخر مرة كان عايز ينزل الجنين من بطني عشان مخلفتشي منه وخايف على إحساسها ان انا حامل وهيه لأ؛ طب انا ذنبي ايه؟ دي إرادة ربنا.
وقتها حلف عليا بطلاق لو منزلهوش اكون طالق ورفضت خوفًا من ربنا اموت نفس؛ طردني من البيت وانا طلبت الطلاق وبعدين رجعت؛ هوه ساكن ف مكان شغله بعيد عني وهيه معاه مكان شغله.
انا مش قادرة اتقبلوا في حياتي تاني، عندي اموت ولا اتقبله، بسمع صوته يحصلي انهيار وعايزه اصرخ أو اموته أو موت نفسي.
واهلي رافضين الطلاق عشان خاطر الاولاد وهوا كمان رافض الطلاق عشان الاولاد؛ وبفكر اخد الولاد واهرب بس مليش مكان اروح فيه.
اعمل ايه؟ اعتبرني اختك أو بنتك...
