أيوه، ده اللي هنتكلم فيه؛ وهاقولك بشكل علمي وعملي ومبسيط وباللغة العامية: ازاي تهرب من فواتير أو شحن عداد الكهرباء للأبد !انا اتصلت بأكتر من 8 شركات منهم في القاهرة والجيزة واسكندرية، والشركات دي متخصصه في مجال الطاقة الشمسية وتقريبا كلهم كلامهم واحد، ماعدا شركه فيها customer service.
حد فاهم جدا وفضلت معاه تقريبا نص ساعه كامله لحد مافهمت لب الموضوع بالتفاصيل الدقيقه جدا، والشركه دي اسمها جيسك للطاقه الشمسيه ومقرها اسكندريه.
أولا وقبل اي حاجه لازم يسألك استهلاكك قد ايه في الكهربا في الشهر او بتشحن بكام تقريبا شهريا علشان يقدر يعرف استهلاكك وكمان يسألك عندك اجهزه ايه في
الشقة واستهلاكها كام ساعه تقريبا يعني مثلا عندك تكييفين واحد حصان ونص وواحد اتنين وربع وسخان كهربا 30لتر وغساله اتوماتيك وثلاجه وديب فريزر ويبدأ يحسب متوسط استهلاكك بالكيلو وات وعلشان نبقي عارفين الحصان بيسحب 746 وات فالساعه وبكده
هنقول تكييف واحد ونص حصان بيسحب746×1.5= 1120وات فالساعه يعني كيلو وعشر من الكيلو وتكييف تاني اتنين وربع يعني 746×2.25=1678 وات يعني كيلو ونص وشويه وسخان كهربي نقول 1200وات فالساعه علي غساله ومراوح ومكواه واتنين شاشه مثلا ولو قولنا هنشغل التكييفين اربع ساعات يعني 120+1678=2798×4=11192 يعني تقريبا 12كيلو وات يوميا مع العلم ان المكيفات بتفصل وتشتغل في خلال الست ساعات اللي بتشتغلهم يعني صافي شغل اربع ساعات وكذلك السخان ولو قولنا سخان كهربي 30 لتر بيسحب 1200وات يعني كيلو واتنين من عشره من الوات فالساعه هيشتغل ست ساعات صافي في اليوم يبقي 1200×6=7200 يعني سبعه كيلو وشويه وطبعا السخان برضوا بيفصل ويشتغل يعني كده اكثر الاجهزه استهلاكا فالشقه هيسحبوا مع بعض حوالي 20 كيلو وات فالاستهلاك اليومي اللي هما سخان وتكييفين وطبعا لو سخان وتكييف واحد يبقي اقل طبعا وعرفنا كده نحسب استهلاكنا ازاي وكل جهاز سواء ثلاجه او
ديب فريزر او شاشه او مروحه او غساله او مكواه او استشوار او هيتر او مايكرويف مكتوب عليه بيسحب كام وات فالساعه يعني الثلاجه مثلا بتسحب من 180الي 250 وات فالساعه علي حسب القدم يعني كل اربع ساعات شغل متواصل لثلاجه 14قدم مثلا بتسحب كيلو وات واحد ومتوسط شغل الثلاجه فاليوم حوالي 8 ساعات صافي يعني حوالي 2 كيلو وات يوميا وقيس علي هذا بقي كل أجهزتك بورقه وقلم كده وطبعا أهم حاجه اننا نعرف نحسب استهلاكنا والكيلو وات يعني الف وات والحصان بيسحب 746 وات تقريبا يبقي تقريبا كده احتياجنا في اليوم حوالي من 22كيلو الي 25 كيلو وات خلال اليوم كله يعني لو حسبناها علي الشريحه الاولي يبقي 22×38 قرش =836قرش يعني حوالي 8جنيه ونص ولو عالشريحه التانيه 22×48=10.56 قرش وطبعا لو عندك الاجهزه دي هتوصل للشريحه الرابعه بعد استهلاك اقل من اسبوع يعني هنقول 22×96=21.12 يعني 22جنيه فاليوم تقريبا يعني شهريا 633.60 جنيه يعني متوسط 650 جنيه في الشهر.
ولو على الشريحه الخامسه يبقي1.18جنيه×22×30=778جنيه شهريا علشان تشغل كل تكييف 4 ساعات صافي شغل يعني نقول ست ساعات يوميا لو
التكييف مثلا هيشتغل عشر دقايق ويفصل خمس دقايق وطبعا لو ضاعفت مدد التشغيل دي هتدفع تقريبا 1200جنيه علي الشريحه الرابعه وهتدفع 1556 شهريا علي الشريحه الخامسه و الاستهلاك ده المفروض انه متوسط ومش عالي وفي ناس طبعا عندها تكييف واحد واستهلاكها اقل من كده.
كده اعتقد ان اي حد يقدر يحسب استهلاك شقته بسهوله جدا وميحتارش
نيجي بقي للمهم حضرتك هتتصل بأي شركه مختصه بمجال الطاقة الشمسية وانا هسيب عنوان شركه محترمه وناس فاهمه بجد لو حد عايز يستفسر منهم بس هما ف اسكندريه واتصلت بأكتر من 6شركات فالقاهره ماستفدتش كتير لكن شركة اسكندريه دي ناس متخصصخ فعلا وفاهمه بتعمل ايه ويمكن انا قولت قبل كده في تعليقي علي الموضوع ده اني اتعاملت قبل كده مع شركه متخصصه فالمجال ده وبرضوا كانت من اسكندريه واول شركه تخصصت في مجال الطاقة الشمسية كانت ف اسكندريه بس انا كان تعاملي معاهم في شغل في قريه سياحيه سنه 2008 ومكنتش متخيل اني ممكن افكر اعمل الموضوع ده ف بيتي
المهم
حضرتك هتتصل بيهم بعد ماتكون حسبت تقريبا استهلاكك او هما هيحددوا الاستهلاك بس انا علمتك تبقي فاهم
كده حضرتك محتاج محطة طاقه شميه صغيره واستهلاكك زي ماقولنا 22كيلو تقريبا يوميا هتلاقي المختص يقولك ان الكيلو وات في محطة الطاقة الشمسية بيعمل حوالي خمسه ونص كيلو علي الاقل لو قولنا اننا بنحسب علي يوم شتوي مفيش فيه شمس وكده كده دي بتكون محطات طاقه ضوئيه ولو في شمس هيكون انتاجها اعلي بكتير يعني دلوقتي حضرتك محتاج محطه خمسه كيلو وات وكل كيلو وات منها بينتج خمسه ونص كيلو وات يوميا يعني كده المحطه الخمسه كيلو وات دي هتنتج 27.5 كيلو يوميا وانت استهلاكك تقريبا 22كيلو زي ماقولنا وكده يبقي تمام جدا وهيكون عندك فائض كمان.
المحطات دي بتنقسم لقسمين 1-محطه طاقه شمسيهoff grid او محطه خارج شبكة الكهربا الحكوميه ودي تكلفتها 32000جنيه علي كل كيلو وات يعني لو قولنا هنركب محطه خمسه كيلو يبقي تكلفتها بتكون 160000جنيه ودي مش بتحتاج اي دعم خارجي وبتركب في الاماكن اللي مش داخلها كهربا حكوميه او في الصحراء او في استراحات عمال في شركات في اماكن بعيد عن الاسكان وبتتكون من الواح طاقه +بطاريات +موصلات+شاحن +قواعد حديد والبطاريه الواحده سعرها 6000 جنيه والوحده الخمسه وات دي بتاخد 8بطاريات يعني البطاريات فقط سعرها 48000 جنيه وطبعا دي تكلفه عاليه جدا ومش دي اللي احنا عايزينها.
2-محطة طاقه شمسيه on grid او داخل الشبكه وهي دي اللي احنا عايزينها ودي تكلفة الكيلو وات فيها 17000 جنيه يعني الوحده المتوسطه اللي بنتكلم عليها هنقول خمسه كيلو يبقي5×17=85000جنيه وبتتكون من الواح+انفرتر+موصلات+شاحن+قواعد. ودي بتركب علي شبكة الكهربا اللي موجوده وبتتوصل عن طريق شركة الكهربا اللي انت تابع ليها لانها خليه داخل الشبكه
نيجي بقي لسؤال مهم جداالكيلو وات من الواح الطاقة الشمسية بياخد حيز كام على السطح مثلا؟الكيلو بياخد عشره متر متربع علي السطح يعني لو وحده 5 كيلو هتاخد 50 متر مربع علي السطح وزي ماقولت هتنزلك اقل حاجه 27 كيلو وات وبتوصل لخمسين كيلو وات يوميا لو في الصيف واللوحات عليها ضمان 10 سنين والانفرتر خمس سنين وممكن تعمل عقد صيانه سنوي ب2.5%من تمن الوحده يعني حوالي2400سنويا واول سنه صيانه مجانيه ومعظم الشركات بتقول ان الالواح والانفرتر عمرهم الافتراضي اقل حاجه 25سنه وصيانتهم سهله جدا بنغسل اللوحات بالميه فقط وممكن منحتاجش لشركة صيانه.
نيجي بقي لنقطه مهمه جدا
ايه الاجراءات اللي اعملها علشان اركب وحدة او خليه طاقه شمسيه عندي؟
اولا هتروح اي شركه متخصصه في المجال هتقولهم انا عايز اعمل محطه هيبعتولك مهندس مختص يحسب الحسابات اللي حسبناها فوق دي☝️ وهيقولك هنركبلك محطه خمسه كيلو هتديلك علي الاقل 27كيلو وات يوميا وانت استهلاكك عمره ماهيجيب الرقم ده وهيعملك مقايسه وهتدفع عربون نقول 10000جنيه.
والشركه دي لازم تقدم المقايسه دي لشركة الكهربا اللي انت تابع ليها وبترد عليك في خلال مده اقصاها شهر وممكن يردوا عليك بعد اسبوع.
حضرتك هتروح تقدم طلب لعداد كهربا تاني في شركة الكهربا اسمه عداد طاقه شمسيه وتمنه تقريبا 7000جنيه وبعد ماشركة الطاقة الشمسية تخلص شغلها هتتصل بيهم يبعتولك فني من شركة الكهربا الحكوميه يوصلك العداد الجديد وهتعمل معاهم عقد سنوي يعني طول ماستهلاكك في الشهر مجابش الكيلو وات اللي بينزلك من خلية الطاقة الشمسية مش هتدفع ولا مليم واخر السنه مش هتدفع الا رسوم بسيطه جدا بيقولوا حوالي 80جنيه فقط.
نيجي بقي لطرق الدفع في شركات كتير جدا متخصصه في مجال الطاقة الشمسية بتدخل بنوك وسيطه بينك وبينها لو حضرتك مش عايز تدفع كاش والموضوع ده بيبقي عن طريقها هي وانت ملكش اي علاقه بيه هما بيقدموا طلب للتقسيط والبنك بيضمن ويخد احتياطاته ودلوقتي احنا وصلنا لتكلفة 92000 جنيه لو قولنا خلية الطاقة الشمسية مع عداد الكهربا الجديد وممكن تدفع مبلغ مقدم فقط وتقسط الباقي يعني ممكن تدفع مثلا 20000 جنيه وتقسط ال70 الف كل شهر مبلغ علي ست او سبع سنين وبعد كده هتبقي عندك كهربا مستديمه ومبتقطعش ابدا لا صيف ولا شتا وتشغل تكييفاتك براحتك ولا فواتير ولا خلافه وتستخدم كهرباء مجانيه لاكتر من ٢٥سنه والحكومه ملهاش حاجه عندك الا اذا استهلكت اكتر من اللي الخليه منزلهولك بس طبعا انت هتعرف تظبط استهلاكك واعتقد ان الخليه مش هتخليك تستهلك من عداد الحكومه نهائي بل هيكون عندك فائض بس لازم الموضوع ده يتم بمعرفة الحكومه لانك هتعدل في دخول شقتك من العمومي واي شركه تانيه هتقولك غير كده تبقي بتضحك عليك ومفيش اي ضريبه علي الموضوع ده.
