أختنا (م.أ)؛ تسأل: عن طريقة أخذ علاج السكر والضغط على نفقة الدولة؛ وتقول: لو حابة اصرف علاج ماما بتاع السكر والضغط على نفقة الدولة -مالناش تأمين- خصوصًا أنه بيكلفنا ١٨٠٠ جنيه و ده فوق طاقتنا، هل ده ممكن أو متاح ؟
الرد
طريقة ١: حضرتك هتروحي معهد ناصر وتكشفي عادي وتطلبي من الدكتور أنه يعمل قرار، والتمريض بتاعه بيقولك تروحي تصوري التذكرة والبطاقة وتديهم للتمريض، وبعد اسبوعين تقريباً بتروحي تستلمي القرار وبتصرفي علاجك، وممكن بعد كده يحولوكي على أقرب مستشفى ليكي.
طريقة ٢: هتكشفي باطنة في مستشفى حكومي، وبعدين تكتبي علاج نفقة الدولة، والدكتور بتاع المستشفى اللي كاتبه هو اللي هتاخديه سواء اللي بتاخده او بديل؛ لأن غالباً مش هيدوكي نفس العلاج.
طريقة ٣ (مجربة من صديق): رحت المستشفى الحكومي، وكنت جايب ورقة من التأمينات اني مش عامل تأمين، ودخلت المستشفى مصور البطاقة فوق بعضها مش وش وظهر، وذهبت للمختص بالأمر في المستشفى، قالي هات الورقة دي من المكتب جنبي، جبتها وقالي روح ورد ٢٠ جنيه في الخزينة، عملت كده ورحت للمعمل بتاع المستشفى، تعمل التحليل ويطلع لك النتيجة وتقوله انك بتاخد أقراص أو انسولين، وتاخد الورق ده توديه للاخصائي الأول ويقولك تعالى بعد ١٥ يوم يكون ورقك اتوافق عليه -ان شاء الله-؛ القصة كلها مش بتاخد ربع ساعة ان شاء الله.
