مشكلتي مع سلفتي سليطة اللسان

[محتار]

انا عندي سلفه وحيده، البنت دي بتستغلني اوي بطريقه غريبة، ولسانها سليط اوي، بتتكلم معايا اسلوب شتايم ودعاوي حتى في الهزار، رغم اني اكبر منها بسنين.

انا طبعي مبعرفش احرج حد خالص ولا بعرف ادافع عن نفسي.

سلفتي دي بتكره حماتي واولادها جدا وبتقعد تشتم عليهم وتشيلني في ذنب، غير الكلام بيتنطور هنا وهنا ويرجعو يلفو الكلام ويقولوا ان انا اللي قولت كذا وكذا.

بتستغلني، بتطلب مني الحاجات عيني عينك كده، يعني هاتيلي كذا، اديني كذا، انا عايزه كذا؛ وانا مبعرفش احرج حد خالص، ولو رفضت اديها بتلوي بوزها وتخاصمني لوحدها كده، وتكلمني باسلوب وحش اوي، ولو واجهتها بتعيط والموضوع يكبر وتعمل مشاكل.

انا مش عارفه ابعد عن البنت دي ازاي، مش سيباني حتى على النت، هي في مكان وانا في مكان، بتفضل تبعت في شتايم اني مطنشاها، مبردش عليها وبتقعد تشتم عليا في البلد قدامهم رغم انهم بيردو غيبتي، بس الكلام بيوصلني.

اتعامل معاها ازاي، حصلتلي عقده كل ما باشوف رقمها او رسايلها.

[جناح طاير]

دي مقاطعه فورا؛ لأن هتفضل حياتك كلها كدا، اعتزليها؛ ولو اتكلمت عليكي انتي اللي هتاخدي الحسنات، بس ما ينفعش تتواصلي معاها، ولو ينفع سلام وبس لكنك بتقولي ملحقاكي وسليطه اللسان.