انا شاب حرفيا من اول يوم جواز ليا وانا مش سعيد، انا متجوز في بيت عيلة وكان فيه مشاكل عادية زي اي مشاكل بتحصل في بيت عيلة، الحموات والعروسة وحماتها وكده، بدون دخول في تفاصيل، بس طبعا عشان انا مبقاش ظالم شايف أن مراتي حتى لو غلطانة باتكلم معاها بالراحة وباقنعها ننزل نتكلم مع امي، على العلم أن أمي ست طيبة جدا جدا بس معرفش معيشاني في نكد ليه، وكل شوية تدعي عليا وتفضل تدعي وانا اقول معلش وانزل أراضيها.
لي
أخ اكبر مني بسنتين، بتحبه اكتر مني لانه سره معاها وفلوسه وكده، انا عكسه بحب حياتي الشخصية انا اللي اقررها، اتجوز مين كدة يعني ! لما مراتي حملت نزلت عرفتها حصل مشاكل عشان بتقولي حماتك عارفة الاول وتدعي على ابني اللي مكنش لسة جه على وش الدنيا.
أمي بتكره حماتي ومفكره أني بحب حماتي اكتر منها، على العلم بغلط في حماتي عشان اقنع امي أن محدش يقدر ياخد مكانها، المهم في خلال السنتين جواز بعد ما بقي عندي
ابني "فارس" حصل مشكلة بيني وبين مراتي وضربتها، راحت غضبت عند اهلها وعملت محضر ضرب وكانت عايزة تطلق، انا قولت خلاص انا غلطت اني ضربت بس هطلقها لأنها متوصلش أنها تشكيني، على العلم أنهم حذروني مضربهاش تاني هما مرتين، بس اللي ضربت وعارف أنه غلطت، قعدت شهرين في البيت؛ لي أختين بنات وواحدة في البيت مع أمي واحدة منهم عايزاني أطلق والتانية العكس.
وامي بقى دي اللي مش فاهم حاجة ليها، كنت باكل واشرب مع امي وتقولي رجع مراتك وعيش، حاولت كده قالوا شوف سكن بره انا رفضت روحت قولت لامي قالتلي وماله يابني وبيتك مفتوح، قولتلها لاء، عدى ١٠ ايام فضلت افكر وقولت ابني ومراتي وقررت اوافق على السكن، قولتهم بس بشرط نقعد مثلا ٦ شهور وارجع بيتي تاني، قالوا ماشي، جيت قولت لامي قالتلي لو خرجت من البيت مش هترجعه تاني وانا بريئة منك ليوم الدين !! وفجأة اخواتي معاها في موقفها، واخويا الوحيد كمان ماشي على هواهم، قولتهم هو إما إني أطلق مراتي وإما تعملوا معايا كده ؟
وخرجت بره البيت، واليوم اللي بخرج في العزال شتايم وقلة أدب فيا وفي مراتي قدام زمايلي اللي بينزلوا الحاجة معايا، ويخلوا أولاد اخواتي الصغيرين يزغرطوا، ووصل بيهم الحال يكسرروا ورايا قلة أو معرفش ايه!، على العلم اني مش عايز اخسر اهلي وعايز اودهم بس هما اللي قافلين الباب وبيخلوني احس اني وحيد، مع اني مش محتاجلهم ماديا محتاجلهم كأهل بس وأنهم مني، هل لو قاطعتهم حرام ؟
هل لو روحتلهم مناسبات ومش قابلوني لازم اروحلهم تاني ؟
امي سبب في كسرة نفسي وابويا راجل كبير شايل أيده من كل حاجة !
انا مقدرش استغني عن أمي وهي سبب تعاستي وبتحب اخويا اكتر مني، محتاج نصائحكم.
