دلوقتي أنا راجل عندي ٣٦ سنه، منفصل بقالي ٧ سنين وعندي طفلين عايشين مع أمهم والحمد لله مش مخليهم محتاجين حاجه، وفكرة الزواج تاني صعبه عليا علشان خايف جدا اكرر اللي عانيت منه مع
طليقتي -بدون ما ادخل في تفاصيل بس ربنا عالم عانيت قد ايه وحاولت كتير علشان ما يحصلش طلاق- دلوقتي كل اللي حواليا بيقولولي انت سنك صغير ولازم تتجوز علشان في المستقبل مش هتقدر تعيش لوحدك طول العمر.
فأنا استقريت اني لو هتجوز تكون واحده مش بتخلف، علشان الأسباب دي:- اولا اني مسؤول عن أولادي وعمري ما هاتخلى عنهم مهما حصل، يعني هبقى مسؤول عن اولادي والزوجه الجديدة، يعني مش حِمل بيت واحد لأ اتنين.
- السبب التاني اني محتاج اعيش حياتي واحاول اعوض اللي فات، وأسعد نفسي وأسعد اللي هتكون زوجتي من غير اي ضغوط.
- والسبب الثالث إن دخلي مش هيتحمل إني اخلف تاني وكده هاكون باظلم اولادي وباظلم نفسي واللي معايا، علشان طبيعي هاقصر في حقهم واحتياجاتهم.
ومحتاج اخد رأيكم؛ هل كده ابقى اناني بتفكيري ده؟ ولا اتوكل على الله وأبدأ ادور على امرأة لا تنجب للزواج واعيش حياتي؟ ولا اصرف نظر عن الزواج اصلا؟واتمنى الرد يكون بدون غلط او فلسفه ويكون بالنصيحه لأني لسه مقررتش اصلا وباخد رأيكم.
