أبي توفى وحزني عليه كبير جدا

[محتار]

انا عندي مشكلة وارجوكم قولولي على حل اتخطي بيه اللي انا فيه؛ انا أبي مات من حوالي اربع شهور ومن ساعتها كل اما افتكر أنه مات قلبي يوجعني ومش قادرة اصدق اني مش هاشوفه تاني، حاسه اني بحلم! ازاي هو مات وازاي هو عدى عليه الشهور دي وهو بعيد عني ومن غير ما اشوفه، نفسي انا عارفه أن ده قضاء الله بس اقسم بالله انا قلبي بيتقطع كل اما أتخيل اني مش هاشوفه تاني.

انا بموت كل دقيقة وحياتي بقت عبارة عن حزن مكتوم جوايا، وملامحي بقت كلها حزن؛ انا متجوزة ومخلفه وللاسف جوزي بيقولي انتي مأفورة اوي، انا معشتش مع حد قد ما عشت مع ابويا، اقسم بالله حاسه اني بحلم، ارجوكم ساعدوني.

[جناح طاير]

دا طبيعي لان الام والاب والاخوات مبيتعوضوش أبدا، بس دي سُنّة الحياة وكلنا هنموت، هو اختلاف في الميعاد بس لكل واحد فينا، حاولي تتغلبي علي حزنك بالصلاة والقرآن وادعي له على طول.

هو دلوقتي لا يجوز عليه غير الدعاء، وبيعرف مين الليل بيدعو له وبيفرح جدًا، وعلى فكرة، هو حاسس بيكِ وبحالتك ودي حاجة بتتعبه، عيشي حياتك واخرجي وفكي حالة الحزن وربنا يرحمه ويغفر له ويسامحه ويتجاوز عن خطاياها ويجعله مع الشهداء والصديقين والصالحين وحسن أولئك رفيقا، ويلحقنا به في الجنة يارب ويحسن ختامنا جميعاً.