ابن عمتي كلم ماما وقالها انه جاي يخطبني بعد العيد اللي جاي، وكان عايز يكلمني يعرف رأيي فيه ايه، كلمته وقولت له اني مش عايزاه واني بحب واحد تاني، قولت له ياريت متقولش لحد على الكلام اللي قولته له، وخلصت الموضوع معاه على انه خلاص مش هييجي يتقدملي، وجه تاني يوم اتصل بيا يقولي انا مش هاخد على كلامك وجاي بعد العيد هخطبك.
قولت له مش عيزاك، انا بحب واحد تاني، قالي هقول لامك عشان تربيكي، فضلت اتحايل عليه عشان ميقولش لماما برضه مُصِر انه يقولها، اخر ما زهقت معاه قولت له خلاص تعالى اتقدملي، قالي هفكر في الموضوع وهشوف هاجي ولا لا.
بعدها بيومين عمتي كلمت ماما قالتلها انه مش هييجي يخطبني، قالهم البنت مش عيزاني ومقالش لما اني بحب حد تاني، وخلاص الموضوع خلص.
جه تاني يوم يتصل على عمي ويعيط وقال له انا عيزها، وعمي ادخل في الموضوع وخلص الكلام على انه هييجي يخطبني بعد
العيد، واهلي عايزين اتجوزه غصب عني وانا مش بحبه ومش عايزاه، ومع العلم انا مفيش حد في حياتي ومش بحب حد وقولت له كده عشان يمشي؛ دلوقت اعمل ايه عشان ميجيش يخطبني؟
