مشكلتي الإهمال؛ الاهمال في كل حاجه؛ الحمدلله الحياة ماشية وتمام في ظل الأيام اللي احنا فيها ربنا ساترها معانا؛ الإهمال يتلخص أني متجوز ومش متجوز؛ مش حاسس بوجود الست؛ الست اللي ليها لمسه في البيت؛ لمسه في نفسها؛ اه بتتعب بس على الفاضي؛ يعني ممكن طول النهار تغسل وتنشر بالنسبة ليها هو ده النظافة.
مفيش حاجه الستات وتفاصيلها؛ دايما البيت فيه تراب؛ الشبابيك عليها كوم تراب؛ غرفه النوم مش مهندمه؛ التراب على كل خشبه فيها.. باختصار مش بتعرف تعمل زي اغلب الستات؛ دايما اقولها بيتك مملكتك مش لازم كل يوم بس تعرفي ايه اللي لازم يتعمل.
باحاول افهم على أد ما اقدر؛ بس انا نفسي يبقي هيا ليها لمسه ستات في بيتها؛ تسريحتها دايما مكركبه؛ والله العظيم حاجات كتير؛ مش عارف اعبر ..
نفسي تبقي احسن واحده في الدنيا؛ مش عاوز حد يعلق عليها ومش عاوز كمان أشتكي لأهلها تاني؛ لأني اشتكيت مرات.. والآخر رضيت بالامر الواقع.
محدش يقولي انت شايفلك شوفه والكلام ده لأني عاوزها ونفسي تكون اشطر حد في الدنيا.
