انا عندي ٢٨سنه ومنفصلة، ومعايا بنت وولد ومشكلتى دلوقتي ان متقدم لى عريس والله من اول يوم رمضان، هو اصغر منى بسنه بس اللى يشوفه يقول هو اكبر منى بكتر، المهم سبت الموضوع لحد بعد العيد، عشان افكر؛ لان اتخاذ القرار فى حاجه زى دى صعب شوية، المشكله اصلا انى مش بعرف اخد اى قرار، ولو فكرت اعمل كده محدش بيعبرني ولا بعمل بكلامي رغم انها حياتى انا.
انا موافقه عليه لانه موافق على وجود عيالى معايا، بس طبعا عندي فى البيت مش راضيين عشان هو عنده
شقة ايجار مش تملك، وعشان القبض بتاعه اقل من ٥٠٠٠ ألف جنيه.
المهم انا كونت موافقه اوى، ودلوقتي مش عارفه اعمل ايه، والله هو انسان كويس جدا، بس مش قادره أقف واقول موافقه، باختصار شديد معنديش شخصية نهائي، أمي دايما بتخلي
أخي الصغير ياخد قرارات عنى، وتقولي اصل هو متعلم وفاهم، عشان هو مهندس وانا دبلوم تجارة؛ انا اسفه يعني مع احترامي لأي حد، والله انا كرهت التعليم اصلا.
المهم انا اعمل ايه؟ انا واثقه انه شخص مناسب، بنفس الوقت معنديش شجاعة واقول هو ده المناسب.
