زوجي امبارح شتمني بالأم والأب، وقال لي غبية وملكيش لزمة في البيت، كل ده بسبب انه جايب صنايعي بقاله حوالي اربع ايام بيهد سقف الحمام ويبنيه، لان كان هيقع بسبب الصرف عند والدته في الشقة اللي فوقنا، وبيفضل الصنايعي طول اليوم وهو يقول لي اقفلي الاوضة واقعدي.. وبعدين يقول ماغسلتيش هدومي ومفروض تطبخي الغدا بالليل.
انا مستحملة عصبيته من اول
الجواز، واصلا هو بيسافر وينزل اجازة كل سنة، بس المرة دي الطيران قفل، قعد فترة بقاله اربع شهور ولسه ماسافرش، وكل كبيرة وصغيرة يعلق عليها، حتى العيال ينتقد تصرفاتهم.
مع العلم، موضوع الحمام ده من سبع سنين بدأ، وهو مارضاش يقول لاهله يصلحوه، وانا كلمتهم بعدها كذا مرة وهو
مسافر ومحدش اهتم، لحد لما السقف قرب يقع قرر يقولهم ويصلحه.
ربنا يعلم استحملت معاه كتير طول الـ ٨ سنين جواز دي.
دلوقتي انا مش عارفة اعمل ايه لما اهانني كده، انا كنت هطلع لمامته اشتكيلها بس منعني، ومش بيتاسف على اللي قاله، بيقول انتي السبب اللي خلتيني اقول كده، وكان بيقول لي امشي كمان، وانا قلتله ده بيتي، اللي عايز يمشي يمشي، انا قاعده، بس مش بنتكلم خالص؛ حاسة باهانة شديدة، خصوصًا انه غلط في اهلي.
