أمي صعبة جدًا في التعامل مع
أبي طول عمرها، ودلوقتي هي حصلها مشاكل صحية وحركتها بقت محدوده، واحنا 3 بنات بنخدمها ومش سايبنها، كل يوم واحده مننا عندها لان كلنا متجوزين.
المشكله أنها رغم كل اللي هي فيه مستمرة في معاملتها السيئة مع أبي، والمشكلة الأكبر انها مش عاوزانا نخدمه ولا نساعده في اي حاجه، ولا حتى نكلمه في التليفون ولا نقعد معاه.
هي طول عمرها كده، بعدتنا عنه، بس دلوقتي هو كبر في السن وبيصعب علينا، ومع ذلك مش عاوزانا نعمله أي حاجه ولا حتى عاوزاه يأكل كويس.
نعمل لها هي أكل كويس وهو يأكل أكل أي كلام، الاكل اللي هي مش عاوزاه بس اللي تدهوله، احنا شدينا معاها أن كده كتير عليه وأننا هنخدمهم هم الاتنين والأكل ليهم هم الاتنين.
هي رفضت وقالت محدش منكم يجيلي، ولا عاوزه حد يعملي اي حاجه؛ كلمناها كتير مفيش فايدة، ومش عاوزه تتنازل؛ مش عارفه الحل ايه؟
