جوزي
مسافر وماديا الحمد لله كويس، يعني ممكن ينزل عادي نهائي. اتكلمت معاه كتير جدا جدا وزهقت لدرجة اني كرهته وعايزه اطلق، مش راضي، ونفسيتي بقت سيئة، وبفكر أفكار سلبية كتير.
عايزه حل يرضي ربنا، جواز خمس سنين ما اشوفش وشه فيهم الا سبع شهور، انا يعتبر عروسه ما فرحتش بأي حاجة، عايزه حل للي انا فيه..
اخليه يطلقني ازاي، ومش عايزه اخد اي خطوة في المحاكم علشان سمعة الاولاد، ومقفل عليا الدنيا في النزول، واني اعمل دراسات عليا او حتي اروح احفظ قرآن، خلاص جبت اخري؛ او اني اشتغل.
والله نفسي، وأصلي الحمد لله مش بسيب فرض، بس احتياجي اكبر من كل ده، وهو عارف كويس جدا جدا ده، ومع ذلك مطنش ومش متجوز هناك، وانا متأكده، ولما بقوله يقولي كل الناس كده وانتي اللي الموضوع ده عندك اوفر، انا هوديكي لدكتور.. وكلام صعب من كده، كأني بطلب منه العيب والحرام، كرهته وكرهت حتي ابص في وشه وهو بيكلم
أولادي، حتى الكلمة الحلوة مش بيقولها لي.
وللعلم، رافضه سفره من اول ما اتقدملي لاني كنت عارفه نفسي، وهو وافق وقال هينزل نهائي، او هياخدني معاه، ولم يفي بوعده، عايزه اطلق من غير مشاكل، قولوا لي لو سمحتوا من غير ماحد بس يغلط فيا، انا بني ادمه ودي طاقه تحملي، واللي انا بطلبه ده لا عيب ولا حرام، وحقي اطلق واتجوز واحد يصوني بدل اي حاجه حرام.
