المحرر موضوع: ما يحدث في لعبة ببجي ليس مجرد جيم مع ناس عشوائية والسلام  (زيارة 36 مرات)

إنسان حر

  • Hero Member
  • *****
  • مشاركة: 524
    • مشاهدة الملف الشخصي
امبارح كان عندي شوية مشاكل وضغوطات في حياتي فقولت افتح ببجي العب شوية جايز انسى، ولو لوقت صغير. بعدها فتحت الليست بتاعت الفريندز لقيت عندي ١٣٥ بنوتة ومش لاقية ولا واحدة تلعب معايا، وقفت حوالي ١٠ دقايق لوحدي على اللوبي وزهقت، بعدها قولت اشوف لو بنت مصرية باعتة تجنيد فهدخل معاها.

لقيت واحدة باعتة تجنيد ومصرية، فرحت جداً جداً ودخلت معاهم في التيم، وهي قالت السلام عليكم، فتحت المايك ورديت السلام، بعدها قولت ليها بالله ما تطلعيني والله مش لاقية حد العب معاه خلوني العب معاكم، لقيتها سألتني انتي بنت ؟ قولتها اه والله العظيم انا بنت، قالتلي عندك كام سنة ؟ قولتلها ١٨ قالتلي وانتي عندك ١٨ سنة وجاية تقولي والنبي لعبوني معاكم ؟

انا تغاضيت عن سخريتها ومردتش ، بعدها سمعت صوت ولد ف سألتها وانتوا بنات صح ؟ فضحكت بسخرية وقالت لا احنا ولاد ، انا مردتش لإني معرفتش اقول ايه ! فبعدها التانية اللي كانت معاها قالت مين دا اللي بيقول فيه ولاد ؟ قولتلها معلش والله بس انا سمعت صوت ولد ف حبيت اتأكد بس ، ف لقيتهم بيضحكوا هما الاتنين وقالوا يلا يبت اطلعي برا امشي من هنا يلا برا برا.

بعدها انا خرجت من التيم بباقي كرامتي ولقيتني رجعت واقفة لوحدي تاني ! حقيقي زعلت جداً وقعدت اعيط و افتكرت يوم ما انا مرة كنت باعتة تجنيد علشان اشوف بنات تلعب معايا، وطفل ولد عنده ٧ سنين دخل معايا وقالي ارجوكي متطلعينيش انا مش لاقي حد يلعب معايا والله، وكمان بصي انا جالي اسكن عربية جديد تعالي ندخل جيم شوفيه ؟

لقيتني بعمله اد بعد ما عرفت انه طفل وقولتله ابقا ابعتلي لما متلقاش حد تلعب معاه ، فرح جداً وقالي بجد ؟ قولتله اه والله بجد يا صغنن ، بعدها دخلنا جيم و دورنا على عربية لحد ما لقينا، وطلع اسكن باجي -مع اللعبة كلها أصلاً- بس مقدرتش اكسر فرحته، وقولته بفرحة دا جميل جداً، وهو كان فرحان اوي بكلامي وبالاسكن...

قارنت بين الموقفين وبعدها عطيت تاني وقفلت اللعبة كلها ، اللي هو انا أصلاً واحدة مغتربة وببقا فرحانة كمية فرحة لما بلقا حد مصري معايا في التيم وبحس اني لقيت كنز وخصوصاً لو بنات بتعرف عليهم وبضيفهم ، فكنت مبسوطة جداً اني لقيت بنتين ، وحقيقي لو البنتين دول موجودين في الجروب معايا هنا وشافوا البوست دا، فانتوا شخص أناني ربنا يسامحكوا بجد على جحود قلبكم دا انا قولتلكم ارجوكي معنديش حد العب معاه ! بلص انا عارفة ي جماعة انها لعبة لكن المشكلة مش انها لعبة او لا ، المشكلة في الموقف نفسه و انهم كسروا فرحة وخاطر حد بالشكل دا :')

فياريت كلنا نقدر ان دي لعبة وجايز حد كان جاي يلعب شوية وينسى همومه ف بلاش تقوم انت تخرجه م اللعبة بهموم اكتر :')