(م.ع) تسأل؛ ياريت اللي عنده اولاد في مدارس ستيم (مدارس المتفوقين STEM) يقولي رأيه فيها عشان بنتي عايزه تدخلها وانا خائفة من فكرة الداخلي؛ وكمان النسبة المرنة في دخول الجامعات؛ ارجوا الافادة.الرد١. أنا والدة عبدالله محمد جابر، الاول على مدارس ستيم علمى علوم، السنه اللى قبل اللى فاتت، انصحك تدخلى بنتك المدرسة، لانها فعلا غيرت ابنى تمامًا وعلمته حاجات كتير لا يمكن يتعلمها من
الثانوية العامة، مهارات وتعليم مش حفظ؛ وشخصية واعتماد على النفس.
٢. أحد الأصدقاء قال معلومة خطيرة للأسف؛ وهي ان فيه شرط مهم لازم تعرفه، لو دخلت وعاوزه تحول ثانوي عام تاني هتدفع ٥٠ أو ٦٠ الف على كل سنة قضتها في المدرسة.
٣. (هبة) تقول: جميله جدا ومستواها حلو وامان ما تخافيش حاجة حلوة بجد؛ لنا ولدين من الجيران فيها.
٤. و (محمد) يقول: بالمجمل، هتكون متعبه جدا ولكن في المقابل هتخرج منها عبقرينو فعلا، اما لو هدفها كليات القمة المتاحة في مصر هتكون الثانوية العامة اسهل لها.
٥. وأيضًا (هنا) تقول: مش شرط تيجي ليها في محافظتك، انا من اسكندرية وبنتي في الاقصر، بتروح ١٨ ساعة سفر بالقطار كل اسبوع، وحاجه كمان؛ من اول السنة اللي فاتت مضونا على طلب بعدم المطالبة بتقليل الاغتراب.
٦. وهنا (غادة) تقول: ممتازة، بس عايزة طلبة مجتهدة. هتذاكر وهتتعب كثير؛ بناتى الاتنين كانوا فيها، واحدة خلصت والتانية رايحة سنة تانية.
٧. أما (أسماء) فتقول: بنتى هناك؛ الدراسة صعبة بس جميلة وبتشغل مخ الاولاد وتغير شخصيتهم للأفضل؛ والطلبة كلهم ما شاء الله شاطرين؛ فبيحمسوا بعض ويشجعوا بعض؛ اتكلي على الله وقدمى.
٨. كذلك (ندى) تقول: هي عظيمة جدا، وحقيقي الطالب بيكتسب خبرات اكبر من سِنّه، لكن فعلا عيبها النسية المرنة وانها محتاجة مجهود مضاعف عن الثانوية العامة، بس حقيقي الخبرات والمهارات المكتسبة منها متتعوضش؛ ده غير انها بتزود نسبة قبولها في المنح والمسابقات العالمية.
٩. لكن (محمد) يقول: عن تجربة،
المدرسة عظيمة جدا. والنسبة المرنة ماهو الا تنسيق عادي زي الثانوية العامة بالظبط بس لان عدد طلبة ستيم اقل بكتير من عدد طلبة ثانوية عامة؛ طلبة اقل من ستيم الجامعات لان مينفعش كله يدخل طب وهندسة لان الجامعات مش هتستوعب كل دا؛ فمثل ما ثانوي عام ليهم نسبة في كل كلية درجتها بتتحدد حسب درجات سنتها، اللي هو التنسيق، ستيم ليها نسبة فكليات معينة عشان يحقق نسبة معينة مع طلبة ثانوي عام، اللي هو تنسيق بردو لكن بمنافسة أعلى بسبب طبيعة المدرسة والطلبة.
