انا عايزة رأيكم بما يرضي الله في ان الراجل مش ابن واخ بس هو كمان زوج وأب وكل واحد في دول له حقوق وواجبات. انا متجوزه من أربع سنين في بيت عيله في بلد بعيد عن اهلي وبلدي؛ يكاد يكون مروحناش انا وجوزي ولا مرة كزيارة ولا حتى في المناسبات؛ مجرد بس احيانا بييجي يرجعني لو انا غضبانة.
وفتحنا صفحة جديدة في رمضان وان هنقضي العيد الصغير والسنه كلها عند اهله؛ والعيد الكبير بس عند اهلي؛ وفعلا عيشنا شهرين في هدوء وانسجام من أجمل ما يمكن من اول رمضان لحد الايام دي.
والده متوفي وأمه مش من النوع اللي بيكبره او تتفق معاه هنعمل كذا ايه رايك..
لأ اللي بيحصل لو فيه موضوع انها هتتفق مع الناس وتدفع مع نفسها وفي الاخر تبلغه الموضوع زيه زي العامه؛ بس قبلها بدقائق عشان يحضر نفسه كواجهه.
حتى في جواز اخته او خطوبه اخوه او اي اي حاجه عموما هو مش اكتر من واجهه.
وده مش مضايقني؛ هي حره وهما احرار في بعض؛ وانا اصلا مش من النوع المتطفل اطلاقا.
اللي مضايقني بس انه يكون واعدني بحاجه او مخططين حاجه وتجي تفشكلها في ثانيه بخططها المفاجئه؛ وده حصل كتير بعد ما اكون رتبت نفسي لوعد ما او خطه ما وحلمت بتفاصيلها وحلمت ازاى هحققه.
عمرها ما دبحت؛ واول ما حست اننا هنقضي العيد الكبير عند اهلي قالت ازاي؛ دانا هدبح السنه دي؛ واتاريها بالفعل متفقه في جزء من دبيحه مع ناس ومتفقه مع جزار وكله تمام؛
ناقص بس جوزي يكون واجهه.
واللي خلاها تعلن عن ده بدري برغم ان المفروض اننا كنت عرفنا يوم وقفه عرفات؛ انها حست من وسط كلام ابنها اللي هو جوزي اننا رايحين في العيد عن اهلي.
المهم هو مره يقولي خلاص نقضي العيد هنا ومره يقولي خلاص نقضي اول يوم هنا ونسافر تاني يوم.
انا هنا تنحت وانهارت وفضلت يومين اعيط من قهرتي؛ وحسيت اني مش قادره اقعد ولا ثانيه معاهم تاني؛ وسافرت عند اهلي.
حسيت انه خاين وانه ملوش كلمه كالعاده؛ وان مفيش حاجه بيوعدني بيها وبتتحقق وان احتياجاته ورغباته هو ومامته بس اللي بيتحقق وانا مهمشه.
حسيت انه مش منتمي ليا زى ما انا منتميه ليه وكل ولائي ليه.
لدرجه اني حتى اللقمه اللي باكلها منه لو مش قاعد بدعيله ولو قاعد ببوس ايده وحصل وعملت ده قدام مامته وعمه لانه فعلا كان ولي نعمتي وكان كل ولائي وانتمائي ليه ؛ بس حاسه اني خلاص معدش عايزاه وكفايه عمر ضايع على الفاضي.
اصل مش معقول سنين كتير وحلم بسيط زى ان تمشي انت وجوزك وابنك مع بعض ماسكين ايد بعض اسرة صغيرة كاملة وادخل بيهم على اهلي اسرتي الكبيرة وافرح باللمة والمشهد ده؛ مشيت غضبانه زبله انا وابني كالعاده بدون زوج كالعاده وكأني مطلقة.
وأتسائل؛ ليه مبقاش مطلقه رسمي؟ معقول حد يقولي تخربي بيتك عشان سبب تافهه زى ده؟ طب لما تافهه وبسيط وسهل ليه بقالي سنتين بحلم بيه ومش عارفه احققه.
