انا عندي مشكلة او مش عارف هي مشكلة ولا حاجة طبيعية؛ اني عمري ما ارتحت لحد، يعني اي حد بتعرف عليه مهما كان معايا كويس بحس ان انا مش مرتاح له، او انه شخص مش كويس، وتقريبا اي حد باتعرف عليه بيبقى نفس الشعور.
عمري ما اتعرفت على حد وحسيت ان انا مرتاح له كدة، زي ما بنقول حتى لو اعرفه لمدة طويلة وبقينا مثلا قريبين من بعض دايما بحس ان فيه عدم
ثقة او عدم ارتياح، وده بيخليني عمري ما اتكلمت مع حد على راحتي، دايما اي كلمة بقولها ببقى عامل لها الف حساب في دماغي وازاي الكلمة دي ممكن تعود عليا بحاجة سلبية، زي انه يعايرني بيها في يوم او ينقلها، مع انه ساعات بيبقى كلام عادي بس ببقى هتكلم والاقي نفسي سكتت واتكلم في اي حاجة ملهاش لازمة.
عارف ان الزمن ده محدش يتأمنله بس برضو الواحد بيحس انه محتاج حد يحس انه خفيف معاه وعليه، ويتكلم براحته كدة؛ مش عارف ده طبيعي ولا دي حاجة نفسية مع ان سني مش كبير، وعموما مفتكرش اني اتعرضت مثلا لمواقف تخليني مبأمنش لحد كدة وشكاك كتير.
