عاوز هدية تبقي بسيطة ومعبرة؛ زوج هيجيبها لزوجته في عيد زواجهم.
الردالهدية دى حسب شخصية الشخص مش القيمة. فيه ست تحب الورد والشموع. فيه ست تحب تتهادى برفيوم. فيه ست تحب تجيلها حاجه عملية شنطة مثلا. فيه ست تحب
الهدايا الـ personal حتى لو بسيطة. حاجة معمولة ليها هي. فيه ست تحب الفضة والإكسسوارات وست متحبش. يحاول يشوف هي تحب ايه، مش هو عاوز يجيبلها ايه او مقدرته ايه.. احلى هدية لما تعرف هى محتاجة ايه فعلا ونفسها في ايه وتجيبهولها.
ممكن مثلا يخرجها خروجة حلوة ويقولها انه بيحبها.
أو مثلا هيجيب كل الصور اللي اتصوروها مع بعض بالترتيب من الأقدم للاحدث من اول
الخطوبة لحد اليوم؛ ولو كانت في موبايلات يفرغها على اسطوانة او فلاشة ويطبعها ويجيب ألبوم وسط مش غالي قوي في حدود الفلوس اللي معاه ويحط الصور دي ويكتب تحت كل صورة كلمة ليها ويغلفه تغليف حلو؛ والف مبروووك وكل سنه وانتم طيبين.
ممكن يحجزلها في كوافير مثلا تقص شعرها او تغير لونه وفيه أماكن بتبقي اسعارها لطيفة تعمل حمام مغربي مثلا ومساج؛ هيبقي تغيير لها وحاجة جديدة ورفاهية منسية وسط زحمة ومسؤوليات الحياة؛ ربنا يخليكم لبعض.
ونصيحة: بلاش حاجة المطبخ؛ خليها حاجة شخصية أحسن حتى لو كررتها، وممكن الحاجة الفضة يكون عليها اسمك واسمها سوا أو كلمه أو جملة بتمثل حاجة خاصة بيكم.
كمان ممكن ورد وولع شمعة بمكان بتحبوه بالمنزل وعبر لها عن اللي بقلبك لها، الله يسعدكم ويديم المحبه ويرزقكم سعادة الدارين وفضله ومحبته.
نصيحة أخيرة؛
لو حضرتك ليك اخت او هي ليها اخت اطلب منها تحجزلها في كوافير على اد الفلوس اللي حضرتك مخصصها، مثلا مساج او قص شعر وصبغه يعني حسب الامكانيات، وحضرتك اليوم دا تودي الاطفال -لو عندكم اطفال- من اول الفطار والتمارين والغذاء والعشا والاستحمام وكل حاجه واديها اجازه اليوم دا تماما. هتبقي شحنت طاقه ايجابيه لشهور قدام. لو مفيش اطفال يبقي جهزلها غداء او عشاء في البيت او من برا حسب الامكانيات او حتي خدها اكلها ايس كريم او عصير من بره.
