انا تعبانة نفسيا، انا مطلقة من سنتين من زوج كان لا يقدر الحياة الزوجية، وصعب ارجع له تاني نهائي، وده مش نابع مني لوحدي ده حتى والدته ووالده عارفين انه مش محترم ومعترفين، ومش عايزيني ارجعله لأننا أقارب، وبيقولوا كده كفاية انه يخسر الاهل في بعضهم.
انا معي ولد وبنت، وكل ما افكر ارجع له علشان أولادي اشوف الشريط الأسود للمعاملة، خصوصا انه لم يتغير، وزي ما هوه مازال في كل شيء سيء، وهو كمان اتجوز وخلف ومش بيصرف كويس على بيته التاني ولا على عيالي، يعني رجوعي فيه تعب وشقاء.
انا دلوقتي قاعدة مع والدتي، ووالدي متوفي، وباخد معاش والدي، بس المشكلة ان ليا أخ مش شغال في شغل ثابت وعلى طول عند أمي قاعد معاها، متجوز وعنده ولد وقاعدين معانا، مع ان له شقة خاصة بيه، بس مشارك أمي في معاشها، وبيبص في معاشي كمان، ويضايق أولادي.
انا تعبت نفسيا، أصرف على أولادي وأساعد امي وأعطيه فلوس احيانا، مع انه قادر يشتغل، بس عايز شغل معين ومش عايز يشتغل غيره، وارجوكم محدش يقولي ارجعي لابو أولادك ده هيدمرني بمعنى الكلمة، مش كلامي ده كلام اهله وأهلي وكل اللي حواليه.
انا مش عارفه اعمل ايه ومش عارفه اخد شقة بره لان والدتي خايفة عليا؛ انا تعبت والله، قولولي اعمل ايه.
