أنا أم لطفلين ومتجوزة بقالي 7 سنين، جوزي عنده مرض الوسواس، على نفسه بيخاف لو حتى صدع، وكل شويه يكشف على نفسه، كل مرة مرض شكل، ويعمل تحاليل ويروح الصيدليات والدكتوره تقول له مفيش حاجه، وانا تعبت معاه جدا.
في أول الجواز كنت بصدقه واجري معاه في كل حته واهتم بيه وندفع بمئات الجنيهات، ومفهوش اي حاجه، لو جاله برد يبقي خلاص يقولي أنا هموت، لو السكر عالي يبقي هيموت، لو ضغطه وطي، نفس الموته.
لكن دلوقتي انا زهقت اوي، لأن الموضوع بقي شكل مرضي مش طبيعي، دلوقتي لما بيشتكي من حاجه أقوله معلش يقولي يعني ايه معلش؟ ويبصلي بصه اني كدة مش مهتميه بيه، وانا تعبت بجد.
لحد النهاردة راح قاس السكر، يقولي دي السكر 28 قلت له ولسه عايش؟ بقي بجد مستفز، وانا عندي اولاد وهو مش ضهر خالص ولا سند، من اقل حاجه بتحصل له يبقي ضعيف اوي.
