انا سيدة انفصلت عن زوجي منذ عدة سنوات وكل هذة الفترة لم يسأل عن اولادة ولا يبعت فلوس خالص ولا يعرف عنهم حاجه واستعوضت ربنا في كل شيء.
الحكاية اني تعرفت علي شاب اصغر مني بعدة سنوات وحتى عرفتة باولادي وكان بالنسبة لهم مصدر حنان وتعلق بيهم جدا؛ هو ارزقي ظروفة على قدة يعني مش غني ولا يملك سوى رزق يومه.
وتحدث معي لمشروع ارتباط؛ انا موظفة والحمد لله ليا شقتي ووظفتي يعني مش محتجاله يصرف على الاولاد.
بصراحة هو احبني كثيرا وانا اتعلقت بية وبعدت عنة كزا مرة لاختلاف في اوجه النظر ولكنه دائما كان يعود لي ويقولي انا عاوزك انتي، والاولاد دول رزق ربنا بعتهولي وانا هعوضهم ابوهم؛ حتى ابني بيقولة يا بابا ومش عارف غيره اب لان ابوة سابه وهو عنده سنة فميعرفهوش.
وهو اتكلم مع اهلة بس مامته رفضت ودا طبيعي جدا هو شاب ولسة في بداية حياتة وانا كمان قلتله مامتك عندها حق؛ ليه تتجوز ست منفصلة ومعاها اولاد واكبر منك؛ وحاولت الابتعاد عنه واعمله حظر؛ في كل حاجه الاقيه جالي عند شغلي وبيقولي انا حابب اكمل معاكي انتي والاولاد، وامي هاقنعها.
انتي ست ب100 راجل وتستاهلي.
بصراحه تمسكة بيا مخليني عندي امل بس رفض اهلة مضايقني، وقلتلة مش هيحصل حاجه الا بالموافقة؛ انا اهلي بردوة معترضين بس ليا اسلوب في الاقناع.
انا عارفه ان فية فوارق بينا يعني: السن + هو عازب.
بس في كتير رجالة بتتجوز في نفس الوضع دا وحياتهم بتمشي ويمكن احسن وبعدين هو فيه حاجه مضمونة في الزمن ده؟ ما ممكن يتجوز بنت وميكملش شهرين وينفصلوا بس احنا مجتمع ما بيبصش على الامور غير من الشكل الخارجي فقط، لكن مابيشفوش اي جانب تاني في العلاقات.
هو بصراحة ما يملكش اي شيء فقلتلة لما تعمل حاجه يبقي يسهلها ربنا هو بيكسب كويس بس مكنش بيشيل حاجه وقالي هجيب كل حاجه فانا بصراحة معلقة الموضوع وقلت لو فعلا عمل عشاني حاجه وادخر ماله عشان يعمل بيت هكون جمبة وفي نفس الوقت الفترة اللي بيعمل فيها نفسه يحاول يقنع والدتة باختياره والا يبقا النصيب بتاع ربنا.
وفنفس الوقت هيبان اذا كان فعلا متمسك بيا ولا مجرد كلام وخلاص.
احب اعرف رأيكم! ولو حد مر بتجربة شبيهة يقولي؛ وشكرا لحضراتكم واسفة على الاطالة..
اه نسيت اقولكم ان فية شخص غيرة عرف وضعي وظروفي وبردوة شاب وعندة شقته واهلة موافقين وظروفة المادية كويسة بس الصراحه متقبلتوش، يعني القبول دا بتاع ربنا وانا مش عاوزة اتجوز راجل والسلام لازم اتقبل اللي هعيش معاة ده هيبقي معايا باقي العمر.
يعني الحيرة ملازمة قلبي في اني اتجوز واحد بيحبني وما يملكش واهلة رافضين ولا واحد عاوزني وراضي بس انا مش متقبلاة! ولا اريح دماغي واربي اولادي واسبني من الجواز خالص؛ انا تعبت وبجد مش عارفه انا عاوزه، اية انا ست وليا رغبات وربنا مأمرش اننا نعتزل الحياة، بالعكس ربنا امرنا بالعفة عشان نصون نفسنا.
بجد الست اللي بتنفصل دي الله يعينها على اللي بتمر بية من وجع نفسي؛ وشكرا لحسن استماعكم.
