انا من متجوزة من اكتر من سبع سنين، عندي ولدين، وجوزي بيسافر. المهم أن من حوالي اكتر من خمس سنين سلفي اتفق مع جوزي أننا نخرج من شقتنا لمدة سنه مقابل عشر الاف جنيه عشان يتجوز فيها وإلا جوازته هتبوظ وتضيع عليه الشبكة اللي = عشر الاف، اللي جوزي دافع فيهم خمس الاف.
طبعا أنا كنت رافضه نهائي وخليت والدي الله يرحمه يكلم جوزي، لدرجه ان قاله الواحد يبقي عنده جلابيه واحده يقلعها يديها لاخوه ويمشي عريان؟ قاله اه، وطبعا الموج كان شديد اوي عليه. وحكم عليا فعلا اروح ألم عزالي وبعد ما لميت عزالي سلفي اتصل على جوزي وقاله انا هديك خمس الاف بس، جوزي وافق، خاف عليه احسن جوازته تتفركش وفعلا خرجت وقعدت في
شقة بالايجار.
طبعا سلفي اللي كان بيشيل العزال وجوزي كان مسافر، طبعا مش هقولكم على حاجتي اللي اتكسرت، غير الهدوم بتاعتنا والمخدات اللي كانت بتترمي من الشباك، ومن ساعة ما خرجنا جوزي يسافر وانا اقفل الشقة واروح اقعد عند اهلي، والسنة بقت اكتر من خمس سنين.
وانا كل اما اكلم جوزي على الشقه يقولي مالكيش دعوة، طيب الفلوس اللي بتترمي في الارض مش أولادنا أولى بيها؟ طبعا أحنا -اقسم بالله- ما معنا 100 جنيه في بنك، انا فعلا ابويا
الله يرحمه باع لجوزي شقة في بيتنا، بس بعيدة عن بلدنا وفي حته مقطوعة وأولادي صغيرين، يعني عشان اروح اجيب حاجه محتاجة مشوار ييجي نص ساعة، واخاف اودي العزال هناك لأن ممكن يتسرق.
نسيت اقولكم، ان جوزي لما بيرجع من السفر بييجي له كل يوم، لحد آخر أجازة اول ما جوزي احتاج منه فلوس ما شفناش وشه تاني، لحد -اقسم بالله- ما بييجي يعيد على عيل من أولادي في عيد.
سلفي شغال في شركة الخرافي، غير أنه بيروح يشتغل في الفطير، وأقسم بالله مراته بتلبس احسن مني.
سؤالي: خروجي من شقتي حرام ولا حلال؟ وهل انا غلطانه اني باتكلم مع جوزي على شقتي؟ والفلوس اللي بتندفع دي حرام ولا
حلال؟
من فضلكم ردوا عليا وريحوني، عشان انا دهبي بِعته وأولادي مفيش أي حاجه لهم.
