أنا كنت منفصلة، وطليقي متجوز ومعاه أولادي، ورفضوا يقعدوا معايا، قاعدين مع باباهم، هو مقتدر، وكنت -والله- وفرتلهم شقه إيجار وفرشتها عشائهم، مع أني مأخدتش من أبوهم حاجة، واتجوز على فرشتي واحتسبت الحاجة دي بأن أولادي هما هيقعدوا عليها، وتحايلت على اولادي يقعدوا معي قالوا عاوزين أبونا لأنهم بيت عيلة وارياف ومش عاوزين يقعدوا عندي في المدينه، بيتخنقو لما يقعدوا في المدينه.
سيبتهم براحتهم وقعدت ٤ سنين، أنا موظفة، اتقدملي راجل محترم واتجوزني رسمي وبحضور أهلي وأهله وزمايلي، وضمن لي حقوقي، وساب بلده عشاني لان هو من محافظة تانيه، قولتله مش هقدر اسيب شغلي وأسافر وأولادي بيزروني، قال مفيش مشكلة.
أولادي دلوقت مش متقبلينه ووالدتي وأهلي كلموا اولادي قاولهم أنتم قاعدين مع مرات أبوكم وسيبتوا أمكم، امكم لو ماتت محدش هيحس بيها.
أنا أعمل ايه؟ جوزي مقصرش معايا، وفي نفس الوقت لو سبيته مش هيعيشوا برضه معايا، وأنا ماليش حد، والدي متوفي وأهلي كل واحد في حاله.
ده عوض ربنا لي بعد سنين مرة عيشتها مع طليقي وأهله. ومش مقصرة مع أولادي، كل مصاريفهم باجيبهالهم وطلباتهم. مش عارفة أتصرف ازاي وبيقولوا احنا متبرئين منك.
