مشكلة او كارثة .. احمد عنده واحد صاحبه فاتح محل موبايلات احتاج مبلغ لتجديد المحل فطلب من احمد يتصرفله في مبلغ ٥٠ الف وكتب وصل امانة؛ كده طبعا تمام مفيش مشاكل.
فات بقا المعاد اللي متفقين عليه وشهر يجر شهر وهو محله شغال بس رافض يسدد، ولما أحمد زعل وبدأ يطلب فلوسه حصلت الكارثة الكبيرة ... عند أحمد اخته محترمه بس جوزها غيور عليها وبيحبها جدا وحياتها مستقرة؛ مره تليفونها باظ اخده أحمد لصاحبه يصلحه وكان بعد ما صاحبه اخد الفلوس بفترة صغيرة ... المهم لما أحمد اتخانق مع صاحبه وقاله انا شغلي واقف وعاوز الفلوس او هسلم الوصل اتفاجأ ان صاحبه باعتله صور بتاعه اخته في بيتها وصور هي وجوزها متصوره بقميص نوم بس في حضن جوزها على السرير وصور ليها وحدها ... هى كل الصور مفيش صورة تعيبها لكن للأسف هو هدد انه هيبعت الصور دي لجوزها ويقولوا انها كانت بتبعتهاله وعلى علاقه بيه، وجوزها عصبى ومش هيفهم وممكن تحصل مصيبه، دا غير انه مهدده يرفع الصور دي ع النت.
وعلشان بس الناس متفهمش غلط هي صور اه بقميص نوم بس جوزها نفسه اللي مصورهالها على السرير؛ ومحدش يقول اننا نحكيله هيروح يموته في نفس الوقت وتحصل كوارث.
أحمد بجد مش عارف حتى يفكر! الفلوس دي ربنا عالم هو محتاجها ازاي وفي نفس الوقت اخته ملهاش ذنب بيتها يتخرب او تتفضح او جوزها يقتله! يعمل ايه؟
في كل الحالات لو طلب الفلوس التاني هينفذ كلامه ! ولو ساب الفلوس شغله هيقف وهو عنده اولاد وقاعد في إيجار ومحتاج الفلوس دي جدا علشان يشتغل ... هو غلط اننا نفك كرب الناس ولا الغلط فين لما بيته او بيت اخته يتخرب علشان وقف جنب واحد xxxxxx.
