يسأل (ع.ا)؛ ايه التصرف في جار عامل سطح بيته ورشة نجارة وبيفضل شغال خبط ودوشة ماكينات قطع اخشاب صوتها مزعج جدا، ودا كل يوم لحد الساعة ١ بليل ومبنعرفش ننام منه ومؤخرا كمان بقا بيحط سماعات اغاني صوتها عالي علشان يبسط مزاجه وهو شغال.
وكلمته ٣ مرات بمنتهى الذوق وقولتله ياريت حتى تتوقف الساعة ٩ بليل علشان نعرف نقعد في بيوتنا وننام اليل لدراسة ولا شغل تاني يوم؛ وهو ولا اي اعتبار للكلام ومحدش غيري من الجيران اللي بيكلمه لانهم تقريبًا خايفين منه.
رجاء النصح لان حقيقي بفكر ابيع شقتي وامشي بسببه ودا كدا مش معقول. بقالي سنة في الهم دا وهو بيزود الموضوع يوم عن التاني.
الرد
أخي؛ بلاغ فى المحافظة بممارسة نشاط تجاري مخالف فى شقة سكنية دون ترخيص مع اخفاء إسم المبلغ ومش هيعرف مين اللى بلَّغ.
ثم وراه بلاغ في مباحث الكهرباء انه مشغل مكن وسارق كهرباء -إذا كان فعلا كده-.
ثم وراه بلاغ لمصلحة الضرائب انه شغال دون ملف ضريبي ومتهرب -إذا كان فعلا كده-.
وممكن في سياق آخر
وهو شغال اتصل بالنجدة وبلغهم ان المكالمة مسجلة (علشان يرسلوا دورية نجدة) وان فيه ورشة نجارة في سطح العمارة، وهذا تغيير نشاط ومخالف لقرار السيد رئيس وزراء. وباذن لله بيجوا وتثبت الحالة وتروحوا للقسم.
واوعى تعمل تصالح هناك، واعمل محضر تاني بعدم التعرض لك وأسرتك وممتلكاتك.
وايضًا تكون محضر مذكرة، ويا سلام لو فيديو الشغل مساءًا وارفقهم بالمحضر.
وأيضًا تروح بالمذكرة قدم شكوى في الحي، وتتابع معاهم، لو لم يتحركوا تروح بالمذكرة جديدة مرفق بها رقم الشكوى الى المحافظة وتتهم موظفي الحي بالتواطؤ، وتسليمها في المحافظة وتطلع على النيابة الادارية وتقدم نفس المذكرة.
ثم تتصل بشكاوي مجلس الوزراء تبلغهم الشكاوي وأرقام المذكرات.
الطريقه دي بإذن الله هتجيب نتيجة.
