أنا رجل في الأربعين من عمري؛ متزوج وعندي أولاد، وأحب زوجتي جدا، وهي طيبة جدا وبنت ناس طيبين.
المهم أنا أكبر أخواتي؛ مشكلتي في والدتي، علشان أنا طيب وباحترامها ووالدي متوفى، دائما تتعمد تهزقني قدام أولادي وقدام زوجتي، وتحملنى ما لا طاقة لي به.
ولا تتعامل هكذا مع إخواني الاثنين الآخرين، على الرغم من أنهم قاسيين في التعامل معاها.
نفسيتي ساءت جدا، وبدأت أروح لدكاترة نفسيين، وكلمت شيوخ علشان ما ازعلهاش، بس أنا تعبت جدا، وزوجتي تتحمل اهانتها على الرغم من أنها تعامل زوجات أخواتي التانيين بكل احترام، وأقسم بالله العظيم أننا بنراعى ربنا فيها، لكنها تتعمد جرحى وإهانتي.
حاولت كثير أحتويها لكن بلا فائدة، وأنا اتخانقت معاها، وده أدى إلى قطيعة منها.
هي شخصية تستغل طيبة الآخرين.
أنا بقالى فتره باحاول برضه اكلمها لكنها للاسف قاسية معى جدا، وبرضه مش عاوز اغضب ربنا.
وأترجاكم؛ لا أحد يقول لى أولادك هيعملوا كده، لانى اتمنى أولادى يبرونى ربع برِّى لها.
وزوجتى دايما توصينى عليها، على الرغم من معاملتها، وهى ماشافتش فى حياتها اى تعب، ابويا كان معززها وربنا اداها كل حاجه.
