اللي عنده تكييف كل شويه يتصلح، وفيه مشكله في الكارته او موديل قديم او حتى جديد ومالوش قطع غيار، او تكييف يونيون اير اللي دايما فيه مشاكل وعطلان بسبب الايرور كل شويه او تكييف شباك قديم جدا زي فيلبس او كولدير او ميراكو او فالكون او باور ولسه بأوكر ومفاتيح ومش بريموت ولا كارته وريسيفر يقرأ المقال ده ضروري جدا.
النهارده هنتكلم عن موضوع غايه في الاهميه.
زمان لما كان تكييف يتعبنا وكل شويه يعطل وفيه مشاكل في الكارته زي تكييف يونيون اير مثلا اللي كله مشاكل او حتي ماركه تانيه بس كل شويه يعطل بسبب الكارته مكنش قدامنا ساعتها غير
حل من اتنين:- اما نفك الكارته ونصلحها وترجع تعطل تاني.
- او نشتري كارته جديده، وطبعا في كارتات بتبقي غاليه جدا وممكن يبقي التكييف اللي هتركب عليه هلكان وقديم وطبعا في موديلات كتير من التكييفات ملهاش اصلا كارتات في السوق لحد ما الصين من حوالي عشر سنين كده حنت علينا وعملتلنا كارته ماستر بتركب علي كل المكيفات زي ماعملت برضو ريموت ماستر بيشتغل علي كل المكيفات.
دي الصين كمان لما سمعت المشاكل اللي في كارتة فريزر كريازي عملت كارته تشتغل علي كل الفريزرات النوفروست وسمتها (كريازينو)، وسعرها رخيص برضوا.
المهم الكارته دي بقت الحل السحري لكل المشاكل، ودلوقتي لو تكييفك كارتته غاليه او مش موجوده او تكييفك شباك قديم ولسه مانيوال وحضرتك عايز تقلبه ديجيتال يبقي مفيش قدامك غير الكارته الصيني لان تمنها في الارض وبيبدأ من 140 جنيه، يعني ارخص من تمن ريموت اي تكييف، مع العلم انا مركبها من ايام ماكانت ب65 جنيه وشغاله زي الفل لحد دلوقتي وركبتها وتمنها 125 وشغاله لسه زي الفل، واخر كارته ركبتها اخر الصيف اللي فات.
وكمان فيه انواع تانيه الريسيفر بتاعها عليه ارقام مش لمبات وتمنها 350 جنيه، والكارتتين في الصوره تحت.
واي كارته صيني تتميز بريموت فيه اوبشن يمكن مبيكونش موجود في كارتة التكييف الاصليه زي الـ timer on/off و sleep وريموت مخفي علشان الاطفال وفيها كل حاجه.
وبالنسبالي انا افضل وأمتع شغلانه فعلا بحبها اني اغير دايره تكييف قديم مثلا بأوكر الي تكييف بريسيفر وكارته وريموت (
الريسيفر: هو المكان اللي بنوجه ليه الريموت في
التكييف للناس اللي مش عارفه).
ملحوظه هامه:
الكارته الصيني بتحتاج تقسيم الدايره من جديد ومقرفه في بعض التكييفات اللي موتور مروحة الفانه حديث وبسوكيت مش طالع منه سلوك سرعات، علشان كده معظم الفنيين مبتحبش تشتغل بيها وممكن يسيب التكييف عطلان سنين وميقولش للعميل على اوبشن الكارته الصيني، والموقف ده حصل معايا مع اكتر من عميل وبفضل الله تم تعديل الدايره وتركيب كارته صيني وشغاله زي الفل ومفيش ولا عميل اشتكي منها.
ويمكن بعض
الفنيين بيكونوا عارفين ان العميل هيسأل على سعر الكارته يعني لو أخد الكرتونه بتاعة الكارته او صورها وسأل في اي محل قطع غيار التبريد والتكييف هيعرف سعرها وبالتالي الفني مش هيقدر يشتغله ويقوله الكارته بتركيبها ألفين جنيه والكلام ده، وفيه فني قبل كده عرض على عميل كارتته فيها مشاكل انه يشتري التكييف ويخصم ألفين جنيه من تمنه -اللي هما المفروض سعر الكارته- علشان ياخده يركبله كارته صيني ب140 جنيه ويبيعه بسعره عادي، ولما العميل رفض سابه ومشي ومرضيش يقوله علي اوبشن الكارته الصيني.
خلاصة الكلام
تكييفك فيه مشاكل في الكارته ومالوش حل او قديم ومالوش قطع غيار او بأوكر ومالوش كارته وريموت؟
غير للكارته الصيني وريح دماغك والكارته دي موجوده في كل مكان.
الكارته بتيجي معاها الريموت والريسيفر وسينسور الكباس والترامل اللي بتركب بيها كمان والفني بيركب عليها كونتاكتور خارجي وشكرا.
شكرًا مهندس: Omr Amin
