فتاة نكديه وحزينة وعصبية جدا ودبش.. تحتاج دعواتكم ونصائحكم

[محتار]

أنا بنت 23 سنة، وعندي مشكلة وهي إن أنا قليلة كلام يمكن مبعرفش احكي أصلا مع أي حد أو اصنع مواضيع ولو بهزار، بعرف أجاوب بس، ومليش شخصية، أحب الوحدة.

أوقات ببقا نكديه وحزينة ومش عارفة هل ده طبع؟ أو بسبب إن أنا اتخذلت كثير في حياتي وحصل عندي حاله نفسية وتعبت.

أنا عصبية جدا ودبش، بس مش على طول لساني سليط.

المهم أنا عاوزه أجابة لكل كلامي ده، وهل ممكن يؤثر عليا لو اتخطبت أو اتجوزت واستقريت + إن انا مقلتش ولا ميزه فيا، وطبيعي أي انسان فيه ميزة وعيوب والكلمة الطيبة صدقة، وأتمني كل حد هيشوف كلامي ده يدعيلي بجد ولو بالهداية، عشان انا تعبت فعلا.

[جناح طاير]

انتى مش كلك عيوب زي ما بتقولي ولا زي ما انتى شافيه نفسك؛ بالعكس انتى فيكى مميزات ليه ما أكتشيفتيهاش، يمكن اللى حواليكى بيركزوا على العيوب دى وهي ممكن تكون فيكى بس انتى خجولة وثقتك في نفسك شويه مهزوزه وبتخافى من رده فعل اللى قدامك، فعشان كده بتبادرى بالرد بعنف زايد.

بس حاولي دائما تسمعي إللى قدامك كويس، ما تتسرعيش في الرد قبل ما تتكلمى رتبى أفكارك وجربي الكلام على نفسك، ده مع التدريب مش بياخد وقت كثير.

حبي نفسك، انتى فيكى مميزات، دوري عليها من آراء المقربين، وكونك عاوزه تكوني أفضل وشايفه عيوبك دي في حد ذاتها ميزة، لأن في ناس مغرورة وعنيدة حتى في الغلط.
ربنا يوفقك ويصلح حالك وهيديكي لما فيه رضاه، أكثرى من الاستغفار والتسبيح.