مشكلتي في سؤالي باختصار: كيف اعرف ان زوجي يحبني وهو بعيد عني وانه ليس غدار وكذاب؟. والموضوع تفصيلاً أني متزوجة لي ٨ سنين، وزوجي -على كلامه- بيحبني ويقول لي انتي كل حياتي، والكلام الحلو ده.
بس انا باستمرار أشك فيه وأحلم انه يخونني على طول، وأقول له، يقول لي: انتي عمري وانتي و و و و.. وشكوكي واحلامي طلعت صح، هو بيسافر كل إجازة وأشوف تليفونه، والاجازة دي شفت بلاوي، يكلم بنات كتيير، مش واحده ولا اتنين فقط! ورسائل وصور ومكالمات فيديو، وفيه ٢ معاه في الشغل -سمعتهم سيئة- مكلمهم كل يوم واتس، وصور ومكالمات، واللي على الفيس بوك واحده واخد رقم تليفونها، وهو أعطاها رقمه، ومتكلمين أوقاتهم متأخر بالليل.
هذا؛ مع اني غير مقصرة معه؛ من بيت ولا عيال، وهو لما يطلب حاجه وانا بكلمه في التليفون باعملها له بحب.
واجهته بالرسائل وكده، قال لي واحد صاحبي كان عايز اشوف البت بتاعته بتكلم غيره ولا لا! ومره يقول انه هو، وبعدين قال اللي شفتيه غير اللي في مخك خالص، واللي معاه في الشغل بيقول انه مش مديهم وش، وكل رسائله بيطمن عليهم ويكلمهم في كل حاجه.
انا بعد كذبه وخيانته مش مصدقاه في حاجه، وصعبانه عليا نفسي، ومش طايقاه وعايزه أطلب الطلاق منه، بس المشكله معايا ٣ أطفال.
ولما يسافر هبقى على طول في التفكير ده، مخي فيه حاجات كتير متخيلاها، هيعملها وبيعملها، مبقتش أثق فيه ولا اصدقه.
وكلامه كله عن الجنس، وانا ماقصرتش معاه على التليفون، وهو على طول متهيج جنسيا.
وفيه واحده كان بيسألها على سكنها، وواحده بياخد رقم تليفونها، ومكالمات فيديو.. هموت من التفكير ومن اللي باتخيله، وصعبانه عليا نفسي، وعايزه أطلق؛ بس العيال اعمل فيهم ايه.
ارجوكم ساعدوني؛ كيف أعرف زوجي يحبني من قلبه ومش مجرد نفاق؟
